...એ તો 'ચાહ' છે !

સવારે તાજગી લાવે

ને સાંજે થાક મિટાવે

સહુ ગુજરાતીઓ જાણે

કે એ તો ‘ચાહ’ છે !

*** 

બનાવે કીટલીને પણ મંચ

ઉધારી કોને ના ફાવે ?

અહીં એક પાર્લે, બે ખારી

તમારો ટાઈમ જો તાણે

સહુ ગુજરાતીઓ જાણે

કે એ તો ‘ચાહ’ છે !

*** 

બિચારી હોય ‘અડધી’ તોય

‘પુરી’ યારી નિભાવે છે

અહીં કડક છતાં મીઠી

દોસ્તી કોણ ટકાવે છે ?

સહુ ગુજરાતીઓ જાણે

કે એ તો ‘ચાહ’ છે !

*** 

કવિની મહેફિલોમાંથી ચ્હા

ઓફિસનાં ટેબલોમાં ચ્હા

પોલીસ જો પકડે રસ્તામાં

છોડાવે કોણ ? બોલો હા…

સહુ ગુજરાતીઓ જાણે

કે એ તો ‘ચાહ’ છે !

*** 

સરકારી ફાઈલો ઉઘાડે

નેતાઓને ય દોડાવે

દિલ્હીમાં બેઠાંબેઠાં કોણ

બધાને ઊઠાં ભણાવે ?

સહુ ગુજરાતીઓ જાણે

કે એ તો ‘ચાહ’ છે !

*** 

સગાંઓનાં સંબંધ રાખે

પડોશમાં પ્રેમ પણ બાંધે

ઘરે મહેમાન આવે તો

અચૂક જ પ્યાલીમાં આવે

સહુ ગુજરાતીઓ જાણે

કે એ તો ‘ચાહ’ છે !

*** 

આળસ ભગાડે ચ્હા

ઊંઘ પણ ઉડાડે ચ્હા

ભમે શું માથું કોઈનું

દિમાગે આઈડિયા લાવે

સહુ ગુજરાતીઓ જાણે

કે એ તો ‘ચાહ’ છે !

*** 

કોઈકને મોળી જ ભાવે

કોઈ લે કાળીની ચૂસકી

ટ્રેનોમાં વિમાનોમાં

સફર હો લાંબી કે ટુંકી

સહુ ગુજરાતીઓ ‘માણે’

કે એ તો ‘ચાહ’ છે !

*** 

ખુશ્બુ દૂરથી આવે

તલબ પણ એ જ ઉશ્કેરે

ભળે જો આદુ ફૂદીનો

હજારો દિલને લલચાવે

સહુ ગુજરાતીઓ જાણે

કે એ તો ‘ચાહ’ છે !

*** 

ભલેને સ્વર્ગમાં મળતી

કોઈ અમૃત પિયાલીઓ

અહીં ધરતીની જન્નત છે

બસ આ કપ-રકાબીમાં !

સહુ ગુજરાતીઓ જાણે

કે એ તો ‘ચાહ’ છે !

***

- મન્નુ શેખચલ્લી