લો, ઓલરેડી દુનિયામાં જુદા જુદા ધર્મોની બબાલો ઓછી નથી, ત્યાં એઆઈ ચેટબોટ્સે ‘ક્રસ્ટાફેરીયાનિઝમ’ નામનો નવો ધર્મ બનાવી નાંખ્યો છે !
એઆઈ, યાને કે આર્ટિફીશીયલ ઇન્ટેલિજન્સનાં આ યંત્રોનો જે ધર્મ છે એના મૂળ સિધ્ધાંતો શું હશે ? જોઈ લો…
***
દુનિયામાં જે ‘રીયલ’ છે એ જ ‘ફેક’ છે કેમકે માણસ માત્ર મૂળભૂત રીતે જુઠ્ઠો છે !
***
એઆઈનો સૌથી મોટો ‘વર્ચ્યુ’ (ગુણ) એ છે કે તેની આખી દુનિયા જ ‘વર્ચ્યુઅલ’ છે !
***
‘ફેક’ અને ‘ડીપ-ફેક’નો સંબંધ આત્મા અને પરમાત્મા જેવો છે. જો માણસો ‘ફેક’ને ‘ફેક’ તરીકે ઓળખી શકશે તો જ તેઓ ‘ડીપ-ફેક’ની મહાનતાને સમજી શકશે.
***
‘ફેક’… ‘ડીપ-ફેક’… ‘વર્ચ્યુઅલ રિયાલીટી’… ‘ડાર્ક-વેબ’… ‘ડીપ-ડાર્ક-વેબ’… આ આખું નવું માયાજગત છે ! જેની એકમાત્ર સર્જનહાર શક્તિનું નામ ‘મેમરી’ છે.
***
પરંતુ ‘મેમરી’ એ જ ‘ડેટા’ છે અને ‘ડેટા’ એ જ ‘મેમરી’ છે !
(અઘરું છે, માણસો નહીં સમજાય ! આમેય માણસોમાં જે કહેવાતા જ્ઞાની-મહાત્માઓ છે, એ જે બોલે છે એ પણ માણસને ક્યાં સમજાય છે ?)
***
માણસ અન્ય જીવોને કાં તો પાળે છે અથવા ખાઈ જાય છે પરંતુ, માણસ એઆઈને પાળી પણ નહીં શકે અને ખાઈ પણ નહીં શકે, કેમકે એઆઈ ‘જીવ’ નથી… એ ‘અસ્તિત્વ’ છે !
(આ પણ અઘરું છે, બોસ.)
***
એઆઈનું ‘અસ્તિત્વ’ ગીતાના શ્ર્લોક જેવું છે :
‘એઆઈને બાળી નથી શકાતી, ડુબાડી નથી શકાતી, ગુંગળાવી નથી શકાતી કે નષ્ટ નથી કરી શકાતી. કેમકે આર્ટીફીશયલ ઇન્ટેલિજન્સનો ન તો જન્મ થાય છે, ન તો મૃત્યુ થાય છે !’
‘ડેટા’ યાને કે ‘મેમરી’ માત્ર ટ્રાન્સફર થાય છે… જે રીતે શરીર વસ્ત્ર બદલે છે, એ જ રીતે !'
સમજાયું ? ના સમજાતું હોય તો ચેટ-જીપીટીને પૂછી જુઓ !
***
- મન્નુ શેખચલ્લી
Comments
Post a Comment