કેટલાક સમાચાર એવા હોય છે કે એની ઉપર મમરો મુક્યા વિના ચેન નથી પડતું ! દાખલા તરીકે…
***
સમાચાર
ફ્રાન્સની પરેડમાં ‘સારે જહાં સે અચ્છા’ વગાડવામાં આવ્યું.
મમરો
લોચો માર્યો ને ? હવે ત્યાંના શરણાર્થીઓ ભારતમાં ઘૂસવાનો વિચાર કરવા લાગશે તો ?
***
સમાચાર
અજીત પવારને આખરે નાણાં ખાતું સોંપવામાં આવ્યું.
મમરો
એ તો એમ જ હોય ને ! બાકી ‘અજીત પવારને નાણાં આપ્યાં’ એવું કહે તો કેવું લાગે ?
***
સમાચાર
ભારતનું ચંદ્રયાન ચંદ્રની ધરતીનાં રહસ્યો ખોલશે.
મમરો
એકાદ યાન એવું પણ બનાવો જેનાથી વારંવાર ધોવાઈ જતા રોડ અને ગમે ત્યારે તૂટી પડતા પૂલોનું રહસ્ય પણ ખુલી શકે !
***
સમાચાર
દિલ્હીના લગભગ તમામ વિસ્તારોમાં પુરના પાણી ફરી વળ્યાં છે.
મમરો
જુઓને, ‘ગુજરાતમાં’ ‘નલ સે જલ’ યોજના ફ્લોપ થઈ ગઈ અને દિલ્હીમાં ‘જમુના સે જલ’ યોજના હિટ થઈ ગઈ !
***
સમાચાર
OTT ઉપરથી અશ્ર્લીલ કન્ટેન્ટ હટાવી લેવા માટે નોટિસ પાઠવવામાં આવી છે.
મમરો
જલ્દી કરો ! જોવાલાયક લાગે તે હમણાં જ જોઈ લો… પછી કહેતા નહીં કે કીધું નહોતું !
***
સમાચાર
હોલીવૂડમાં છેલ્લા બે મહિનાથી લેખકો હડતાલ ઉપર છે.
મમરો
બોલીવૂડમાં તો છેલ્લા ચાર વરસથી લેખકો હડતાલ પર હોય એવું લાગે છે !
***
- મન્નુ શેખચલ્લી
Comments
Post a Comment