કવિ અને ટામેટાંનો શું સંબંધ છે ? સૌ જાણે છે કે સડેલી કવિતાને બહુ ઝડપથી સડેલાં ટામેટાં આકર્ષી લેતાં હોય છે !
પરંતુ આજે જ્યારે ટામેટાંનો ભાવ 100 રૂપિયાની વિક્રમી ટોચે પહોંચ્યો છે ત્યારે કવિને શું કહેવું છે ?
***
એક રોમેન્ટિક મિજાજના કવિએ તાજી જ રચના કરી છે :
ચમકતો રંગ, નાજુક મિજાજ
આજે શું ભાવ માગે છે !
આ ટામેટાં છે કે પ્રિયતમા ?
સરકારી તપાસ માગે છે !
***
બીજા એક કવિ ખાલી ખિસ્સે આવ્યા છે છતાં એમનો ફાંકો તો જુઓ ?...
વૈભવ હજી સલામત છે
આ મોંઘવારીમાં…
મારા ઘરના ફ્રીજમાં
હજી બે ટામેટાં છે !
***
જોકે આ કવિને હાલની સ્થિતિ બહુ નિરાશાજનક લાગે છે ! સાંભળો…
ધોરણ નથી રહ્યું
મુશાયરામાં દાદનું…
પહેલાં હતાં ડઝનભર
આજે બે ટામેટાં ય નથી !
***
જોકે હવે પછી જે કવિ આવી રહ્યા છે એમણે આ સમસ્યાનો તોડ જાતે જ શોધી રાખ્યો છે ! સાંભળજો…
તમારી દાદની પરવા નથી
ખુમારી તેજ રાખું છું,
જો ટામેટાં પણ ખૂટી પડે
તો ખિસ્સામાં સોસ રાખું છું !
અને…
શ્વાસમાં ભરું છું ઓક્સિજન
પંક્તિ લાલચોળ નીકળશે !
લોહી ચકાસી જોઈ લો
ટામેટાંનો સોસ નીકળશે !
***
છેલ્લે આવનાર કવિની વ્યથા પણ સાંભળી લેજો…
એકના વિરહમાં
બીજું ઝૂરે છે તાપમાં
ટામેટાંના અભાવે
આજે સેવ ગણાય છે શાકમાં !
***
- મન્નુ શેખચલ્લી
Comments
Post a Comment