આજકાલનાં લગ્નોમાં જે બુફે ડિનરો હોય છે એ કંઈ માત્ર ‘ખાવાના ખેલ’ નથી હોતા ! એમાં પણ જાતજાતની ફની વાતો બનતી હોય છે, માત્ર એ જોવાની નજર જોઈએ ! જુઓ…
***
રિસેપ્શનના બુફે ડિનર વખતે ટાઈ, જેકેટ અને સૂટ પહેરીને ફરનારા સૌથી વધુ લોકો કોણ હોય છે, ખબર છે ?
- કેટરિંગના સ્ટાફવાળા છોકરાઓ !
***
રિસ્પેશન કમ ડિનર વખતે બે જ જગ્યાએ લાંબી લાંબી લાઈનો જોવા મળે છે.
એક, લાઈવ ઢોંસાના કાઉન્ટર પર અને બીજી વર-કન્યા સાથે ફોટો પડાવવાના સ્ટેજ પાસે.
***
આ પ્રસંગે લોકો એકબીજાની સાથે જે વાતો કરે છે એમાં ત્રણ વાક્યો કોમન હોય છે.
(1) તમે જમી લીધું ?
(2) જમવામાં કઈ આઈટમ સારી છે ?
(3) શું લાગે છે અદાણીનું ?
***
આવા પ્રસંગે એકસરખી સાડી, એકસરખાં બ્લાઉઝ અને ઇવન એકસરખી હેર-સ્ટાઈલ કરેલી બે મહિલાઓ એકબીજાને મળે, ત્યારે બન્ને વચ્ચે શું વાતચીત થાય છે ?
‘અલી સાંભળ, પેલી સાઈડે બેઠેલા ગેસ્ટને શું જોઈએ છે, જરા ધ્યાન આપ.’
કેમ ? ...કારણ કે એ બન્ને જણી કેટરિંગના સુપરવિઝન સ્ટાફમાં છે !
***
આવા વખતે સૌથી વધુ કન્ફ્યુઝ્ડ લોકો કોણ હોય છે, ખબર છે ?
જેમણે વારાફરતી તમામ આઈટમો ડીશમાં ભરી લીધી છે અને પછી ખબર પડે છે કે આ તો ‘જૈન કાઉન્ટર’ હતું !
- હવે આ ભરેલી ડીશનું કરવું શું ?
***
અચ્છા, ત્યાં સૌથી વધુ અવ્યવસ્થિત અને ગંદકીભર્યું કાઉન્ટર કયું હોય છે ?
ના, એંઠી ડીશોનું નહીં ! પણ જ્યાં પ્લાસ્ટિકના કપ વડે પાણી લેવાનું હોય છે !
- અમુક લોકો તો ત્યાં હાથ મોઢું ધોઈને કોગળા પણ કરી લે છે !
***
અને સૌથી મોંઘુ કાઉન્ટર કયું ?
મુખવાસનું કાઉન્ટર. કેમ કે ત્યાં જ પેલા બે જણા ચાંલ્લો લખવાનો ચોપડો લઈને બેઠા હોય છે !
***
- મન્નુ શેખચલ્લી
Comments
Post a Comment