આજકાલ ‘થોર’ નામની એક અંગ્રેજી ફિલ્મ ચાલી રહી છે. બધા ટીન-એજર્સ અને યંગસ્ટર્સ ખાસ જોવા જાય છે. જોકે મારા તમારા જેવા સિનિયર સિટીઝન્સને એમાં ખાસ ટપ્પી પડતી નથી. છતાં અમારી ખોપડીમાં એની ગુજરાતીમાં જોક્સ બની જાય છે ! જુઓ…
***
થોરની સૌથી ફેવરિટ હિન્દી ફિલ્મ કઈ છે ?
- રાઉડી રા-થોર !
***
થોરને જે દિવસે શાક ના મળે તે દિવસે તે શું ખાય છે ?
- ક-થોર
***
થોર નામના આ વિલન પાસે જે વીજળીની તાકાત છે એ ક્યાંથી આવે છે ?
- થોર-મલ પાવર સ્ટેશનથી !
***
થોર બિચારો શિયાળામાં શું કરે છે ?
- થોર થોર કાંપે છે !
***
થોર રાજસ્થાનમાં કયા રણમાં ગયા પછી મરાઠી બની ગયો ?
- થોર-પાર-કર !
***
થોર એક ગુજરાતી પારસીબાવા પાસેથી શું શીખ્યો ?
- થોરામાં ઘનું !
***
થોર જ્યારે રોમેન્ટિક મુડમાં હોય છે ત્યારે શું થાય છે ?
- થોરા પ્યાર થોરા મેજિક !
***
અચ્છા, થોરની દાઢી ઉપર શું ઊગે છે ?
- સિમ્પલ યાર, કાંટા !
***
થોરનું મૂળ અંગ્રેજી નામ શું છે ?
- કેકટસ ! એટલી યે ખબર નથી ?
***
થોર કદી ઉજ્જડ ગામમાં કેમ નથી જતો ?
- કેમ કે ઉજ્જડ ગામમાં ‘એરંડો’ પ્રધાન !
***
થોર કરતાં વધારે જબરું કોણ છે ?
- પાંચમા ધોરણનો સવાલ છે. થોર કરતાં તો ‘બાવળ’ જ વધારે પાવરફૂલ હોય ને !
***
- મન્નુ શેખચલ્લી
Comments
Post a Comment