પેટ્રોલ સેન્ચુરીની શાયરીઓ !

જેની છેલ્લા છ મહિનાથી રાહ જોવાઈ રહી હતી તે પેટ્રોલના ભાવે આખરે સેન્ચુરી ફટકારી જ દીધી છે !

આ ઘટનાના માનમાં યોજાયેલા એક કાલ્પનિક મુશાયરામાં ગુજરાતના ખ્યાતનામ શાયર સ્વ. ‘સૈફ’ પાલનપુરીની માફી સાથે અમે થોડા છૂટ્ટા શેર રજુ કરી રહ્યા છીએ…

***

પહેલાં સમું સફરનું

એ ધોરણ નથી રહ્યું !

લિફ્ટ મળી જાય તો

સાઈકલ ઘરે મુકી દેવાય છે !

***

કાર ચલાવી શકો, એ

વિષય એક આસ્થાનો છે,

કાર ચાલી રહી છે, તો

પ્રસંગ જુની વારતાનો છે !

***

મારા ત્રાસનું કારણ, શું કહું ?

સાપે ગળ્યો છછુંદર…

દહેજમાં ગાડી મળી, ત્યાં

પેટ્રોલમાં તેજી ચડી !

***

છે હજી ઘણા એવા

જે ટાંકી છલકાવી ગયા…

પણ બહુ ઓછા છે, જે

‘એવરેજ’માં ફાવી ગયા !

***

જોતાંની સાથે લોક

તરત ઓળખી ગયા…

મુજથી વધુ ફેમસ

મારી ખાલી ટાંકી હતી !

***

શું હશે એકાંતમાં

એમની હાલત, ખુદા જાણે

સૌની હાજરીમાં જેઓ

પેટ્રોલ પુરાવી શકતા નથી !

***

‘સૈફ’ રહસ્ય મને

મારા જીવનમાં એ રહ્યું

કેવું આ વાહન હતું ?

’ને શું એની એવરેજ પડી ?

***

છતાં આ શહેરમાં ‘સૈફ’ને

જોયો છે હસતાં કૈંક વખતે

જ્યારે એની બાઈકમાં

બે-ચાર લિટર ‘ભર્યું’ હતું !

***

- મન્નુ શેખચલ્લી