હજારો લોકોએ 500-700 રૂપિયા ખર્ચીને નવી હેલ્મેટો ખરીદી, હવે રૂપાણી સાહેબે શહેરોમાં હેલ્મેટ નહિ પહેરવાની છૂટ આપી દીધી !
કદાચ, હેલ્મેટોના વેચાણનો ‘ટાર્ગેટ’ પતી ગયો હશે ! પણ ભૈશાબ, હવે આ માથે પડેલી હેલ્મેટોનું કરવું શું ?....
***
જેમ ઘરમાં તમે કૂંડામાં છોડવા ઉછેરો છો,
એમ આ હેલ્મેટમાં માટી ભરીને, પાણી રેડીને અવનવા છોડ ઉછેરી શકો છો. ખાસ કરીને ‘મની-પ્લાન્ટ’ બહુ સારા ઉગશે ! (જે વસૂલ થયા એ!)
એ સિવાય પણ અનેક સદુપયોગો છે..
- દૂધની કોથળીઓ ભેગી કરવા માટે વાપરો.
- ફ્લેટમાં ઉપરના માળે રહેતા હો તો દોરી વડે નીચે લટકાવીને શાકભાજી ખરીદવા માટે વાપરો.
- કોઈ વિધિ માટે નાળિયેર ફોડવું છે ? હેલ્મેટ વડે ફોડો !
- શિયાળામાં સૂકામેવા ખાશો ને ? તો અખરોટ ફોડવા માટે હેલ્મેટ ટ્રાય કરી જુઓ..
- આંગળીઓ ઉપર વીંટીઓ પહેરીને હેલ્મેટ ઉપર તબલાં વગાડી જુઓ. મસ્ત રિધમ વાગે છે.
- કિચનમાં કેળાં, સફરજન વગેરે રાખી મુકવા માટે ચાલે.
- વાસણ ઘસવાનું સ્કોચ-બ્રાઈટ, વોશિંગ પાવડર વગેરે પણ રખાય. (એ પહેલાં કેળાં સફરજન કાઢી લેવાનું ના ભૂલાય.)
- ભસતાં કૂતરાંને છૂટ્ટી મારો !
- મેદાનમાં વચ્ચે મુકીને, નીચે સાત ઠીકરીઓ ગોઠવીને સાતોળિયું રમો !
- ઘરમાં ચકલીઓ માળો બાંધી શકે એ રીતે લટકાવી રાખો.
- ઉનાળામાં ઓટલા ઉપર લટકાવીને એમાં પાણી ભરી રાખો, પક્ષીઓની ‘પરબ’ બનશે.
- હેલ્મેટ ઉપર ખતરનાક ટાઈપનું ચીતરામણ કરીને બાબા-બેબીને વેશભૂષા સ્પર્ધામાં ‘તડબૂચ’ અથવા ‘ET’
બનાવીને મોકલો.
- આગળનો કાચ છૂટો પાડીને એની ઉપર ભેદી ડિઝાઈન ચીતરીને જાલિમ ટાઈપના ચશ્માની જેમ પહેરો.
- છેવટે, ફરી કોઈ અવળચંડા ટ્રાફિક રુલ સામે વિરોધ સરઘસ કાઢવાનું હોય ત્યારે પોલીસના લાઠીચાર્જથી બચવા આ જ હેલ્મેટ પહેરો ! થેન્ક્યુ.
***
-મન્નુ શેખચલ્લી
Comments
Post a Comment