ફરી નવું વરસ શરૂ થયું... અને હવે ફરી આપણા શુભેચ્છકો આપણી ઉપર સુવાક્યોનો મારો શરૂ કરશે !
ક્યારેક ક્યારેક તો આવો ‘સુવાક્ય- અત્યાચાર’ કરનારાઓને બોચીએથી ઝાલીને બે ફટકારી દેવાનું મન થાય છે. પણ શું કરીએ ? હમણાં તો એ સુવાક્યોની ‘સફાઈ’ નહીં, ‘સફાયો’ કરનારાં કુ-વાક્યો સુઝે છે...
***
સત્ય હંમેશાં કડવું હોય છે.
- અચ્છા ? એટલે ખાંડ, ગોળ, ચોકલેટ વગેરેમાં કંઈ જ સત્ય નથી ! એમ ?
***
સર્વ દિશાઓમાંથી શુભ વિચારો આવવા દો.
- અને પછી એ બધું ‘ડિલીટ’ કોણ કરશે ? તારો કાકો ?
***
દુનિયા હંમેશાં ઉગતા સુરજની પૂજા કરે છે.
- હા ભઈ હા, પણ જલ્સા તો રાતે જ થાય છે ને ?
***
ઈચ્છા દુઃખની મા છે.
- ભઈ, કુટુંબ-નિયોજન ખાતામાં ફરિયાદ કરો ને ?
***
સ્ત્રી, તારું નામ જ ઈર્ષ્યા છે.
- દિમાગ ના ખાઓ, યાર ! આખા ઈન્ડિયાની વસતી ગણત્રીનું લિસ્ટ જોઈ લો. એક પણ સ્ત્રીનું નામ ‘ઈર્ષ્યા’ નીકળે તો જ આગળ વાત કરજો.
***
હું માનવી ‘માનવ’ થાઉં તો ઘણું.
- આને માટે આધારકાર્ડ ફરીથી કઢાવવું પડે. ઓકે ?
***
ધીરજનાં ફળ મીઠાં હોય છે.
- અને ધીરજનાં લીંબુ ?
***
મારું જીવન એ જ મારો સંદેશ છે
- અચ્છા ? અમારું જીવન તો ‘દિવ્ય ભાસ્કર’ છે.
***
- મન્નુ શેખચલ્લી
Comments
Post a Comment