નાસ્તા પતાવવાનું ઝૂંબેશ કાવ્ય !

પતાવ્યા કેટલા ઘુઘરા,

સુંવાળી ને ભાખરવડી છે ?

ખબર છે એટલી

કે વાઈફની

હાકલ પડી છે !

***

દાંતને દુઃખ દે

એવી ‘સુખ’-ડી

હજી પડી છે,

ખાતાં ચક્કરો આવે

એવી ચક્કરી

હજી બચી છે,

ના ડાયાબિટીસ કે

ના એસિડીટી

અહીં નડી છે..

ખબર છે એટલી

કે વાઈફની

હાકલ પડી છે !

***

ખોરું થશે ચવાણું

વાસી લાગશે ‘લીલો’ ચેવડો,

ખાલી ખખડશે ઘુઘરા ને

શેં ચવાશે બુંદીનો ભૂક્કો ?

કાલ કરે સો આજ કર..

ન ટળશે એવી આ ઘડી છે,

ખબર છે એટલી

કે વાઈફની

હાકલ પડી છે !

***

ટિફિન હો બોસનું

કે કોઈ કર્મચારીનું

મળે છે મઠીયાં સહુને હવે

પાપડને ઠેકાણે,

ન પોચી રોટલી

કે ના સોફ્ટ ભાખરી

મળે છે ફરસી-પુરીઓ

હવે તો ભાણે જ ભાણે !

ના બાંધો કાલનું ભાથું

રળિયામણી આજની ઘડી છે..

ખબર છે એટલી

કે વાઈફની

હાકલ પડી છે !

***

આપો ‘ઉપમા’ હવે

દાળમૂઠને, બ્રેકફાસ્ટની...

માગે જે ભૂલથી પૌંવા

એવા સૈંયાની અછત પડી છે…

ખબર છે એટલી

કે વાઈફની

હાકલ  પડી છે !

***

પતાવશો નાસ્તા જ્યાં

માંડ-માંડ હસતાં

ત્યાં આવી પૂગશે નવો શિયાળો...

ત્યારે હશે એ સિઝન નવી

અડદિયા – પાકની !

ખબરદાર રહેજો

ઝુંબેશો આગળ ઘણી છે…

ખબર છે એટલી

કે વાઈફની

હાકલ પડી છે !

***

- મન્નુ શેખચલ્લી