(નોંધ : દિવાળીના તહેવારો અગાઉ રચાયેલી આ કરુણ રચના બ્લોગ ઉપર મુકવાનું ભૂલાઈ ગયું હતું.)
હો ઊંચી હવેલી
કે નાનકડું ઘર
છે સરખી વ્યથા
માળિયે માળિયે…
***
ના બહાદૂરી
ના બુઝ દિલી
ના શિકસ્ત
ના ફતેહ…
બસ, છે તો છે, જફા !
માળિયે માળિયે…
***
કરોળિયાનાં જાળાં
ચકલીઓના માળા
ગરોળીઓનાં ઈંડા
કે બદમાશ વંદા
છે એ જ જીવસૃષ્ટિ
માળિયે માળિયે…
***
હો પતિ માળિયે
કે ઘરનોકર ગયો,
ફરક છે ઘણો
માળિયે માળિયે
ઠપકો પતિને
મસકો નોકરને
ભૈ છે જ ક્યાં તુલના ?
માળિયે માળિયે…
***
પેલું ત્યાં હશે
કંઈ હશે તેની નીચે
કરી શોધખોળો
ખૂણે ખાંચરેથી
ઝીણી ઝીણી ધૂળોને
ઝાપટી – ઝૂપટીને…
સઘળી પળોજણ
ફરી ત્યાં જ મુકો
આ સંસાર – ચક્રો
રહે ત્યાંનાં ત્યાં
છે વ્યવસ્થા પ્રભુની
માળિયે માળિયે…
***
આંખો રડે
નાક પણ દડદડે
ગળે બાઝે ડૂમો
હોઠ પણ ના ખુલે
ઈમોશનલ કરે
જે રજકણો ત્યહીં
એની છે ક્યાં કદર ?
માળિયે માળિયે…
***
કોઈ પ્યાલો કે બરણી
કંઈ ડોયો કે ગળણી
કોઈ ખીંટી વળગણી
કંઈ દોરી સરકણી
આવે છે મળવા
યાદો પુરાણી
રિપીટ કરે છે
જુની કહાણી
થઈ રહ્યાં ‘રિ-મિક્સ’
માળિયે માળિયે…
***
નવેસરથી માંડે છે
ઘર સૌ પોતાનાં
નીચે માનવીઓ
ઉપર જીવજંતુ
છે સરખી દિવાળી
માળિયે માળિયે…
***
વરસે ખૂલે છે
વરસ બંધ રહેશે
એ વર્ષાભિનંદનમાં
અકબંધ રહે છે
છે મૂંગા કમાડ
માળિયે માળિયે…
***
- મન્નુ શેખચલ્લી
Comments
Post a Comment