ભૈશાબ થાક્યા હવે તો ! આ ઉનાળો તો નરમ પડવાનું નામ જ નથી લેતો…
આમાં ને આમાં ઉનાળાની આઠ અવળચંડાઈ અમારા ધ્યાનમાં આવી છે.
***
એક
એક તો બસમાં ચડતાંની સાથે કન્ડક્ટર સાથે છુટ્ટાની રકઝક થાય… એમાં વળી જ્યાં બેસીએ એ સીટ ‘ગરમાગરમ’ નીકળે !
***
બે
એક તો માર્કેટિંગની જોબમાં ઠેર ઠેર રખડવું પડતું હોય… એમાં વળી એસી ઓફિસમાં બેસીને ઊંઘ્યા કરતા ‘પટાવાળા’ની ઈર્ષ્યા થાય !
***
ત્રણ
એક તો બાથરૂમમાં નહાવા જાઓ ત્યારે નળમાંથી ફળફળતી ચા જેવું ગરમ પાણી આવે… અને ઉપરથી તમે આખા શરીરે સાબુ ચોળીને બેઠા હો ત્યારે જ પાણી જતું રહે !
***
ચાર
એક તો રવિવારની બપોરે જમ્યા પછી પેટ ભરીને ઠંડુ પાણી પીવાની ઈચ્છા હોય.. પણ ફ્રીજ ખોલો તો એક પણ બાટલો ભરેલો ના હોય !
***
પાંચ
એક તો લગ્નની જાનમાં દોઢ કલાક લગી તડકામાં શેકાયા પછી માંડ માંડ માંડવે પહોંચ્યા હોઈએ… ત્યાં જમવામાં રસોઈ ઠંડી નીકળે અને શિખંડ ગરમ નીકળે !
***
છ
એક તો માંડ ટાઈમપાસ કરવા માટે કોઈ એરકન્ડીશન્ડ શો રૂમ મળ્યો હોય… ત્યાં અંદર જતાંની સાથે ચીટકુ સેલ્સમેન આપણી પાછળ જ પડી જાય “શું જોઈએ છે ?” “શું લેવાનું છે ?”
***
સાત
એમ તો પૈસાદારોને ય ઉનાળો નડે છે. જુઓ….
એક તો બાથરૂમમાં નહાવાલાયક એક ડોલ જેટલું ઠંડુ પાણી ના હોય… ઉપરથી બેડરૂમના એસીમાંથી રોજ એક ડોલ ભરાય એટલું પાણી દદડતું હોય !
***
આઠ
એક તો ગરમીને કારણે ખોપડી ઓલરેડી ગરમ હોય… ત્યાં ઉપરથી કોઈ કહે “યે તુમ્હારા મોદી તો ચોર હૈ !”
***
- મન્નુ શેખચલ્લી
Comments
Post a Comment