નથી હોતા... નથી હોતા...
બે વત્તા બે હંમેશાં
ચાર નથી હોતા...
હારનારા નેતાઓ માટે
‘હાર’ નથી હોતા !
***
છ અને છ હંમેશા
બાર નથી હોતા...
ગુજરાતના રસ્તે
બિયરના ‘બાર’ નથી હોતા !
***
એમ તો, શનિવાર પહેલાં
રવિવાર નથી હોતા….
સફેદપોશ ચોરો કદી
‘તડીપાર’ નથી હોતા !
***
ભોજનના બધા થાળ
મોહનથાળ નથી હોતા...
ના છપાયેલા ન્યુઝ જ
‘બનવાકાળ’ નથી હોતા !
***
ગાંડાઓ જ વસે એવાં
કંઈ ગામ નથી હોતાં....
‘ફેમસ’ નામો જેવાં
અજાણ્યા નામ નથી હોતા !
***
‘ભ’ વાળા શબ્દો બધા
કંઈ ગાળ નથી હોતા...
ઘોડીના હોય, પણ ગધેડીના
‘નાળ’ નથી હોતા !
***
થાય બધાથી એવાં
બધાં કામ નથી હોતા...
બેઈમાનોના કદી ‘વાજબી’
દામ નથી હોતા !
***
ભગવાનનાં હોય એટલાં
માણસનાં નામ નથી હોતાં...
બગલમાં હોય છૂરી
મોંમાં ‘રામ’ નથી હોતા !
***
હોય છે... હોય છે...
હોય છે, તે હોય છે...
નથી હોતા, તે નથી હોતા
(વાહ વાહ)
હોય છે, તે હોય છે
નથી હોતા, તે નથી હોતા
પણ...
ન હોવા છતાં હોય...
એવાં ડફોળોનાં
નસીબ નથી હોતાં !
***
અલ્યા, હોય છે...
દૂધથી મોંઘા પાણીના
ભાવ હોય છે
ડાહ્યાથી ઊંચા ગાંડાના
ખયાલ હોય છે
અને...
કવિથી મોટા ક્લાર્કના
પગાર હોય છે !
***
અલ્યા, હોય છે...
મળે છે ‘ફ્રી’માં તોય
એના દામ હોય છે !
'ઝટપટ' ક્રિકેટમાં બબ્બે
‘વિરામ’ હોય છે !
બિઝી લોકો બિચારા
આરામ શોધે છે...
અને નવરાંઓને જ કેટલાં
કામ હોય છે !
***
અલ્યા, હોય છે...
ચ્હા કરતાં કીટલી
ગરમ હોય છે !
ફ્લોપ થયેલો ફિલ્મ-સ્ટાર
નરમ હોય છે !
પાપીઓને નડતાં
કરમ ભલે ના હોય
આઈટમ ગર્લને ય થોડી
શરમ હોય છે !
***
અલ્યા, હોય છે...
સપનામાં ક્યાંક સાચું
હોય છે, તે હોય છે !
સાચામાં ક્યાંક ખોટું
હોય છે, તે હોય છે !
લુંગીમાં ક્યાંક નાડું
હોય, ના પણ હોય,
સચ્ચાઈના પુરાવા
હોય, ના પણ હોય,
બાકી, ભ્રમણા તો સાલી
ના હોય...
તોય હોય છે !
***
કવિના ‘કષ્ટ’નું ય એવું...
ના હોય, છતાં હોય છે !
- કવિ કષ્ટમ્
Comments
Post a Comment