નવરાત્રિના પાસમાં હવે 'અનામત' ?

તમે માર્ક કરજો… નવરાત્રિના પાસ જેની પાસે પહોંચવા જોઈએ એવા બિચારા યુવાનો પાસે ઓન-એવરેજ માત્ર ‘દોઢ’ પાસ હોય છે !

બીજી તરફ ગરબાના ત્રણ આંટા મારતાં ફેંફેં થઈ જાય એવા ફોદા જેવાં કાકા-કાકીઓ પાસે રોજના ચાર ચાર પાસ એકસ્ટ્રા હોય છે.

અમને તો લાગે છે કે ગરબાના પાસમાં પણ ‘અનામત’ હોવી જોઈએ !

એક મિનિટ, એક મિનિટ, જ્ઞાતિના આગેવાનો ! ઉશ્કેરાઈ જવાની જરૂર નથી… અમારી ‘અનામત ફોર્મ્યુલા’ જુદી છે !

***

50 ટકા પાસ તો મહિલાઓ માટે અનામત રાખો કારણ કે મહિલાઓ છે તોજ ગરબા ‘જોવાલાયક’ બને છે !

જોકે કોઈ યુવક ‘બોબી ડાર્લિંગ’ બનીને આવી પહોંચે તો એને રોકવાને બદલે સીધો સ્ટેજ ઉપર ચડાવી દો !

***

5 ટકા પાસ કાનના ડોકટરો માટે હોવા જોઈએ ! કારણકે સ્પીકરોના ઘોંઘાટથી ભલભલાના કાનના પડદા ઢીલા થઈ જાય છે !

સાલું, છેક બીજે દહાડે સવારે ઊઠીએ ત્યારે ખબર પડે છે કે “યાર, બરોબર સંભળાતું કેમ નથી ?”

તો કમ સે કમ, બીજા દિવસે તો કાનના ડોકટરને ગરબામાં શોધી લેવાય ને !

***

3 ટકા પાસ ગળાના ડોકટરો માટે પણ અનામત રાખો ! સ્પીકરોના મારફાડ ઘોંઘાટમાં ઓળખીતાંઓ જોડે ‘કેમ છો મઝામાં’ જેટલી જરી અમથી વાતો કરીએ એમાં તો ગળાં છોલાઈ જાય છે !

એ તો ઠીક, કોઈ ખાસ મિત્રો ઘણા વખતે ગરબામાં મળી જાય તો “ક્યાં છો આજકાલ ? શું કરો છો ? શેરબજારમાં કેટલા ગયા ? આ રશિયા / ડોલર / મોદી / પર-પ્રાંતિયો / ચૂંટણીનું શું લાગે છે?” એવા માત્ર પાંચ ટોપિક ઉપર વાતો કરો ત્યાં તો સ્વરપેટીઓ હડતાળ ઉપર ઉતરી જાય છે.

બીજું, ગળાના ડોકટરો ‘ઓન-ધ-સ્પોટ’ ટ્રિટમેન્ટમાં 15 ટકાનું ડિસ્કાઉન્ટ આપે તોય સૌને ફાયદો છે.

***

24 ટકા પાસ કોલેજિયનો માટે, 12 ટકા સિનિયર સિટિઝનો માટે, 10 ટકાં ભૂલકાંઓ માટે… અને 2 ટકા પાસ મહિલા પોલીસો માટે રાખો.

***

… અને છેલ્લે, 50 ટકા પાસ ‘માત્ર જોવા માટે’ આવેલા ‘ક્રાઉડ’ માટે રાખો !

તમે કહેશો કે મન્નુભાઈ, તમે ઓલરેડી 106 ટકા ગણાવી ચૂક્યા છો, હવે બીજા 50 ટકા ક્યાંથી ઘૂસાડવા ?

- તો મિત્ર, પાર્ટી-પ્લોટવાળા એ જ કરે છે ! પેલા 50 ટકાને ઘૂસાડે છે એમાં જ તો આટલું ભરચક ‘ક્રાઉડ’ દેખાય છે !

-  મન્નુ શેખચલ્લી