આજકાલ બિચારા ‘સેક્યુલરો’ની દશા ખરાબ છે ! પોતે સેક્લુયલર બની ગયા એટલે હવે ‘હેપ્પી દિવાળી’ અને ‘નૂતન વર્ષાભિનંદન’ના મેસેજો મોકલતાં પણ ડરે છે !
પણ મારા સાહેબો, નવા વરસની શુભેચ્છાઓ મોકલવામાં શું વાંધો છે ? લો, વાપરો…
***
નવા વરસમાં તમને સુભાષ ચંદ્રા કરતાંય મોટી લોન મળે… અને મેહુલ ચોકસી કરતાંય વધુ દેશોના પાસપોર્ટ મળે !
***
મોદીજી કરતાં વધારે ફોલોઅર્સ મળે… અને રાહુલજી કરતાં વધારે ચમચા મળે !
***
હાલમાં તમારું છે એના કરતાં વધારે સારું નામ મળે ! (જો યોગીજી આપવાના હોય તો)
***
અભિષેક શર્મા અને વૈભવ સૂર્યવંશી કરતાં વધારે છક્કા મળે ! (ક્રિકેટની વાત થાય છે.)
***
અભિષેક બચ્ચન કરતાં સારો ‘રોલ’ મળે ! (ફિલ્મમાં નહીં, ઘરની વાત થાય છે.)
***
રાજા રઘુવંશી અને કેતન અગ્રવાલ કરતાં ‘સેફ’ હનીમૂન મળે… અને સોનમ રઘુવંશી તથા સિયા ગોયલ કરતાં ‘ઓછી ખતરનાક’ પત્ની મળે !
અને પાણી ભરવા માટે ભૂરા કલરની પ્લાસ્ટિકની ટાંકી તો પત્નીને ક્યાંયથી ના મળે !
***
મફતમાં ડુંગળી મળે…
ઇનામમાં પેટ્રોલ મળે…!
સપનામાં રિલાયન્સના શેર મળે !
અને લિસ્ટીંગમાં અદાણીના શેર લાગે !
ટ્રેન અને બસમાં બેસવાની જગા મળે… (વેકેશનમાં)
***
પાડોશીના પાસવર્ડ વડે આખું વરસ તમારું વાઈ-ફાઈ ચાલે…
અને પાડોશણના સ્માઈલ વડે તમને આખું વરસ ઓક્સિજન મળે !
***
સરદારશ્રીના સ્ટેચ્યુ કરતાં ઊંચા તમને વિચારો આવે…
અને ગાંધીજીના ફોટા કરતાં ક્યારેક તમારા ફોટાની પણ કિંમત વધારે આવે !
***
વેકેશનમાં જ્યારે માગો ત્યારે બુકીંગ મળે… અને ગુજરાતમાં જ્યારે માગો ત્યારે ‘બાટલી’ મળે !
***
બીજું બધું તો ઠીક, પણ આ વરસે…
વધારે ખુશહાલી, વધારે ધનપ્રાપ્તિ, વધારે સફળતા અને વધારે સુખ શાંતિ મળે…
એવા મસેજો ગયા વરસ કરતાં આ વરસે વધારે મળે, એવી શુભકામના !
***
- મન્નુ શેખચલ્લી
Comments
Post a Comment