બેન્ક કૌભાંડીઓની ડિક્શનેરી !

સુપ્રીમ કોર્ટ કહે છે કે ઓનલાઈન ફ્રોડમાં જેને ‘નુકસાન’ થાય છે તેમને બેન્કોએ ‘વળતર’ આપવું જોઈએ.

હા સાહેબ ! પણ જે લોકો ભારતની બેન્કોનું અબજો રૂપિયાનું ‘કરી નાંખે’ છે એનું વળતર કોણ ચૂકવે છે ? ભારતના નાગરિકો જ ને ?

કેમકે કોર્ટના જજ સાહેબને ખબર જ નથી કે આ કરુબાજોની આખી ‘બેન્ક ડિક્શનેરી’ જ અલગ  છે !

*** 

પાસબુક

જે બેન્ક અધિકારીઓ કરોડોની લોનો ‘પાસ’ કરે છે એમને જે ‘ગુડ-બુક’માં રાખવા પડે છે… એને કહેવાય, ‘પાસ-બુક’ !

*** 

એન્ટ્રી

બિચારા મામુલી ખાતેદારો પાસબુકમાં ‘એન્ટ્રી’ કરાવતાં ભલે થાકી જાય, પણ આ કૌભાંડી ભારત છોડતાંની સાથે જ વિદેશમાં જે ફટાફટ ‘એન્ટ્રી’ લઈ લે છે એ જ એનો સાચો અર્થ છે !

*** 

પાસવર્ડ

‘બેન્ક તમારા બાપની છે’ એવો બેક દ્વારા જ જારી કરાયેલો ખાસ ખાનગી મેસેજ !

*** 

ક્રેડિટ 

બેન્કોની લોનો લઈ લઈને કેટલું મોટું 'કરી નાખવાની' કેપેસિટી ધરાવો છે, બજારની એ ‘શાખ’ને જ ‘ક્રેડિટ’ કહે છે.

*** 

ડિપોઝીટ

આનો તો મિનિંગ પણ ‘ફીક્સ’ છે ! બેન્કના રૂપિયા લઈને પછી સત્તાવીસ જાતની અલગ અલગ બોગસ કંપનીઓમાં જે ‘ડિપોઝિટ’ કરી દેવામાં આવે છે તે !

*** 

વિથડ્રોઅલ

કૌભાંડ છેક નાકની ઉપર જતું રહે, પછી એમાંથી ‘બહાર નીકળવા’ માટે જે અગડમ બગડમ પ્રોસિજર કરવામાં આવે છે, તેને જ વિથડ્રોઅલ કહે છે.

*** 

ઇન્ટ્રેસ્ટ

એટલે ‘રસ’ ! જે માત્ર મિડીયાને પડે છે, એ પણ બે ત્રણ મહિના માટે જ !

*** 

લુકઆઉટ નોટિસ

દેખાવ (લુક) પુરતી બહાર (આઉટ) પાડવામાં આવતી નમાલી, નપુંસક ચેતવણી !

*** 

રીકવરી

ગંભીર બિમારી પછી દવાઓના કારણે દર્દીને જે થોડું સારું લાગે છે તેને જે રીતે આપણે ‘રિકવરી’ કહીએ છીએ, એવું જ લૂંટાઈ ગયેલા નાણાં પાછા લાવવાના લૂલા પ્રયત્નોનું આ નામ છે !

*** 

વોરંટ

ભારતીય બેન્કિંગ સિસ્ટમની સૌથી મોટી જોક !

***

- મન્નુ શેખચલ્લી