આ દુનિયામાં અમુક લોજિક અમને હજી સમજાતાં જ નથી ! જેમકે…
***
છોકરીઓને કહેવામાં આવે છે કે અજાણ્યા છોકરાઓ જોડે વાતચીત કરવી નહીં… પણ પછી એરેન્જ મેરેજ વડે એને સાવ અજાણ્યા છોકરા સાથે પરણાવી દેવામાં આવે છે !
બોલો, એવું કેવું ?
***
અમુક છોકરીઓ પોતે હોટ એન્ડ સેક્સી દેખાય એવાં કપડાં પહેરીને બહાર નીકળે છે…
પણ પછી કોઈ એના સૌંદર્યને ‘એપ્રિશીએટ’ કરીને જોતો હોય તો એની ઉપર ગુસ્સે થઈ જાય છે ! એટલું જ નહીં, એની ફરિયાદ કરવા માટે એ જ વસ્ત્રોમાં ‘રીલ’ બનાવે છે… અને એકસ્પેક્ટ કરે છે કે લાખો લોકો એને ‘જુએ’ !
બોલો, એવું કેવું ?
***
અમુક છોકરીઓ ઓનલાઇન ઓર્ડર આપીને ડલબ-ચિઝ પિત્ઝા, લાર્જ સાઇઝ વેફર્સ અને પનીર મસાલા વિથ બટર નાન મંગાવે છે…
પણ સાથે સાથે ‘ડાયેટ પેપ્સી’નો ઓર્ડર લખાવે છે !
બોલો, એવું કેવું ?
***
અમુક મહિલાઓ ફેસબુકમાં પોતાની અણીથી પાણી સુધીની એક્ટિવીટીના ફોટા અને રીલ્સ મુકે છે…
પણ સાથે સાથે એકસ્પેક્ટ કરે છે કે મારી ‘પ્રાયવસીનો ભંગ’ ના થવો જોઈએ !
બોલો, એવું કેવું ?
***
એમ તો અમુક વડીલો પણ ‘આ મોબાઈલ કેટલો ખરાબ છે… મોબાઈલે સમાજને બરબાદ કરી નાંખ્યો છે… મોબાઈલ આવ્યા પહેલાં આપણે કેટલા આનંદમાં રહેતા હતાં…’ એવા બધાં મેસેજો મોબાઈલમાં જ મુકતા હોય છે !
બોલો, એવું કેવું ?
***
જે હિરોઈન પોતાની બ્યુટિશીયનને લાખોનો પગાર આપે છે, જેનાં તમામ કોસ્મેટિક્સ લંડન, પેરિસ અને ન્યુયોર્કથી આવે છે…
એ હીરોઈનો જાહેરખબરમાં ૨૦ રૂપિયાનું શેમ્પુનું પાઉચ બતાડીને કહે છે કે મારા વાળ આનાથી જ સ્મુધ અને ચમકીલા થાય છે !
બોલો, સાવ આવું ? હેં ?
***
- મન્નુ શેખચલ્લી
Comments
Post a Comment