અમુક નમૂનાઓ મ્યુઝિયમમાં નહીં, પણ આપણી આસપાસ જ હોય છે ! ફક્ત એટલું જ કે આપણે ક્યારેક ધ્યાન નથી હોતું ! બાકી, તમે જોજો કે…
***
તમે મંદિરમાંથી બહાર આવતા હો ત્યારે તમને કોઈ પૂછશે : ‘દર્શન કરવા આવ્યા હતા ?’
(ના, પત્તાં રમવા આવેલો !) શું કહેવું આમને ?
***
ફોન કરીને પૂછશે ‘બે મિનિટ વાત થશે ને ?’ પછી અડધો કલાક સુધી લપ કર્યા કરશે પણ ફોન નહીં મુકે ! આવા નમૂના તો રોજ મળશે…
***
અમુક નમૂનાઓ વારંવાર બોલ્યા કરશે કે ‘તમે લખી રાખજો…’ પણ એ પોતે ક્યાંય કશું ‘લખીને’ રાખતા નથી !
***
અચ્છા, ‘અડધી રાતે મારું કામ પડે તો ફોન કરજો બોસ !’ એવું કહેનારા નમૂનાને તમે ભરબપોરે ફોન કરશો તોય ફોન નહીં ઉપાડે !
(લખી રાખજો…)
***
અમુક લોકો ‘… અને બીજી એક વાત !’ ‘… અને હજી બીજી એક વાત !’ એમ એમ કહેતાં સત્તર વાતો કહી નાંખે છે ! છતાં અઢારમી વાત કહેતાં પહેલાં બોલશે : ‘… અને બીજી એક વાત!’
***
અને અમુક નમૂના પચ્ચીસ જાતની વાહિયાત વાતો કર્યા પછી પણ કહેતા હોય છે : ‘ના ના, આ તો એક વાત થાય છે !’
***
બાકી, સમારંભોમાં તમે માર્ક કરજો, ‘બે શબ્દો’ બોલવા માટે ઊભો થયેલો વકતા, પુરા એક કલાક સુધી બોલ બોલ કર્યા પછી કહે છે :
‘આમ તો આ વિષય ઉપર આખું પુસ્તક લખી શકાય… પરંતુ, સમયના અભાવે, જો ટુંકાણમાં કહું તો…’
એમ કહીને બીજો પોણો કલાક ખેંચી કાઢશે !
***
- મન્નુ શેખચલ્લી
Comments
Post a Comment