દુઃખી ના થશો ! જમાનો તમે માનો છો એટલો ખરાબ નથી ! એકવાર અહીં લખેલી વાતો વાંચી જશો. તો તમે પણ કહેશો કે ‘સાવ એવું પણ નથી…’
***
સાવ એવું પણ નથી કે તમારી કોઈ ‘કદર’ નથી કરતું…
- ચાર રસ્તે ઊભેલો ભિખારી તમને ‘સાહેબ સાહેબ’ કહીને બોલાવે છે !
***
સાવ એવું પણ નથી કે તમને કોઈ ઉધાર આપવા તૈયાર નથી.
- દિવસમાં ત્રણ બેન્કોમાંથી ફોન આવે છે : ‘સર, લોન લેવી છે?’
***
સાવ એવું પણ નથી કે કોઈ તમારી નોંધ પણ નથી લેતું…
- ટ્રાફિક રૂલનો ભંગ કરો તો તમારો ‘ફોટો’ પડી જાય છે !
***
સાવ એવું પણ નથી કે કોઈ તમને પૂછતું નથી…
- મફત પ્રસાદની લાઈનમાં ઊભા હો તો કોઈ આવીને જરૂર પૂછશે : ‘ભઈ, શેની લાઈન છે ?’
***
સાવ એવું પણ નથી કે તમારું કશું ‘ઉપજતું’ નથી…
- બજારમાં કીડનીના બબ્બે લાખ રૂપિયા ઉપજે છે ! પૂછી જોજો.
***
સાવ એવું પણ નથી કે તમારી આ જિંદગીની કોઈ કિંમત જ નથી…
- કોઈ જીવન વીમા એજન્ટને મળી જોજો. તમને નવાઈ લાગશે!
***
સાવ એવું પણ નથી કે આફતની વેળાએ કોઈ સાથ નથી દેતું..
- લગ્નમાં તમારી સાથે ૧૫૦-૨૦૦ જણા હોય છે !
***
સાવ એવું પણ નથી હોતું કે લોકો તમારી પીઠ પાછળ તમારી નિંદા કરતા હોય.
- અમુક લોકો તો તમને મોં ઉપર જ ચોપડાવી દેતા હોય છે !
***
અને સાવ એવું પણ નથી હોતું કે ટીવીમાં બધા કકળાટના જ ન્યુઝ હોય છે…
- ક્યારેક ક્યારેક રાહુલ ગાંધીની પણ હેડલાઈનો બનતી હોય છે!
***
- મન્નુ શેખચલ્લી
Comments
Post a Comment