આપણે સામાન્ય રીતે ૧૩ના આંકડાને અપશુકનિયાળ માનીએ છીએ, પણ તમે જોજો, આ ૩નો આંકડો પણ કંઈ ઓછો નથી !
***
હિન્દીમાં તો કહેવત જ છે : ‘તીન તિગડા, કામ બિગડા !’
***
સંસારીક જીવનમાં પણ જોજો… ‘પતિ પત્ની ઔર વો…’ આમાં ‘વો’ પુરુષ હોય કે સ્ત્રી, એ ખરાબ જ કહેવાય !
***
માણસને સૌથી પહેલો જુગારનો ચેપ ક્યાંથી લાગે છે ? ‘તીન પત્તી’માંથી !
***
માણસના શરીરમાં પણ જુઓ, ભગવાને બધું બબ્બે જ આપ્યું છે ! બે હાથ, બે કાન, બે પગ, બે આંખો… અને ત્રીજું નેત્ર ? એ રાખ્યું છે ! જો ખુલ્યું તો ? સર્વનાશ !!
***
શોલેમાં ગબ્બર શું બોલ્યો હતો ? ‘તીનોં બચ ગયે ! હાહાહા… તીનોં બચ ગયે…’ અને પછી શું થયું ? ઢીશ્યાંઉ… ઢીશ્યાંઉ… ઢીંશ્યાંઉ…!
***
ચાલો, થ્રી ઇડિયટ તો હિટ હતી, પણ એમાં જે ત્રીજો હતો ‘ફીંશૂક વાંગડુ’, એ પાત્ર કોના ઉપર આધારિત હતું ? સોનમ વાંગચૂક, રાઈટ ? હવે જુઓ, એ કેટલો નડી રહ્યો છે ?
***
ખરાબ માણસને શું કહેવાય ‘થર્ડ ક્લાસ !’
ગુનો કબૂલ કરાવવા માટે પોલીસ શું વાપરે છે ‘થર્ડ ડીગ્રી !’
અપમાનજનક તૂંકારો એટલે વ્યાકરણમાં શું ? ‘ત્રીજો પુરુષ એકવચન !’
***
અરે, માણસને કદી એવું સપનું પણ નથી આવતું કે હું પૈસા કમાઈશ તો એમાંથી ‘થ્રી વ્હીલર’ લઈશ !
અને સીટીના ટ્રાફિકમાં આપણને સૌથી વધારે શું નડે ? એ જ… ‘થ્રી વ્હીલર !’
***
મુસલમાનોમાં પણ ‘તલાક’ નામનો શબ્દ ‘ત્રણ’ વાર બોલવામાં બહુ મોટું જોખમ છે !
***
દુનિયામાં સૌથી રહસ્યમય જગ્યાનું નામ શું છે ? ‘બર્મૂડા ટ્રાએંગલ’…
અને સમાજમાં સૌથી જોખમી રિલેશનશીપ શું છે ? એ જ… ‘લવ ટ્રાએંગલ’ !
***
દુનિયાના સૌથી ગરીબ, પછાત અને અવિકસિત દેશોને શું કહે છે ? ‘થર્ડ વર્લ્ડ કન્ટ્રીઝ…’
***
અને આ આખી દુનિયા પૂરેપૂરી ખતમ થઈ જશે, જો શરૂ થઈ જશે…
‘થર્ડ વર્લ્ડ વોર !’
***
- મન્નુ શેખચલ્લી
Comments
Post a Comment