ગુજરાતમાં ભયંકર અને ધોધમાર વરસાદનું રેડ-એલર્ટ જાહેર થયું હતું એનું શું થયું ? ફેસબુકના એક પંચાતિયા ઓટલે એની ચર્ચા ચાલી રહી છે ! સાંભળો…
***
‘લો ! દસ-દસ ઇંચ વરસાદ પડશે એવ આગાહી હતી. પણ બે ઇંચે ય ના પડ્યો !’
‘વાઘ આવ્યો રે વાઘ !’
‘જ્યારે ખરેખર આવ્યો હતો ત્યારે આખું તંત્ર ઊંઘતું હતું ! અને હવે વાઘ આવશે વાઘ… કરીને બૂમો પાડી, ત્યારે વરસાદ આવ્યો જ નહીં !’
‘તંત્રનું રેડ-એલર્ટ આકાશમાં જ લીક થઈ ગયું ! મોદીની વધુ એક નિષ્ફળતા !’
‘ઓ ભાઈ ! બધી વાતમાં મોદીને શા માટે ખેંચી લાવો છો ?’
‘કેમ નહીં ? લોકોએ દુકાનો બંધ રાખી ! ટ્રકોમાં માલ પડી રહ્યો ! એ નુકસાન કોણ ભોગવશે ?’
‘એક્ચુલી તમને કહું ? આ રેડ એલર્ટ આખું વિદેશી કાવતરું હતું!’
‘જાવ જાવ અંકલ !’
‘હાસ્તો ? તમે જોયું નહીં ? છેક યુરોપથી અહીંના મોબાઈલોમાં વોર્નિંગ આવતી હતી ! એનો મતલબ શું થયો ?’
‘ભક્તોને બધે કાવતરાં જ દેખાય છે !’
‘યાર, તમે સમજો.. આટલી મોટી વોર્નિંગ આવી એટલે સરકારે ડેમોનાં પાણી ખાલી કરી દીધાં ! તળાવોના પાણી પમ્પિંગ કરીને ઉલેચી નાંખ્યાં ! વિદેશીઓનો આ જ તો પ્લાન હતો ! કે આપણું સંઘરેલું પાણી ઢોળી નાંખીએ !’
‘મને તો આમાં પાકિસ્તાનનો જ હાથ લાગે છે.’
‘કાકા ! આમાં હવે પાકિસ્તાન ક્યાંથી આવ્યું ?’
‘કેમ નહીં ? આપણે પાકિસ્તાનમાં જતી ત્રણ નદીઓનાં પાણી રોકી રાખ્યાં છે ને ? એટલે એમણે બદલો લીધો !’
‘ખોટ્ટી વાત ! હકીકતમાં તો કોકરોચ પાર્ટીનું આંદોલન ગામેગામ ફેલાવા લાગ્યું હતું ! એટલે આ રેડ-એલર્ટના બહાને સ્કુલ-કોલેજો જ બંધ કરાવી દીધી !’
‘માસ્ટર સ્ટ્રોક, હોં ! માસ્ટર સ્ટ્રોક !’
‘વાહ, આ સારું છે તમારું ! નિષ્ફળ જાવ તો કાવતરું… અને બચી ગયા તો માસ્ટર સ્ટ્રોક !’
***
- મન્નુ શેખચલ્લી
Comments
Post a Comment