મોબાઈલ વિશે સુભાષિતો !

૧૯૯૯ પછી જન્મેલી જેન-ઝિ નામી પેઢીને ‘સુભાષિત’ એટલે શું એની તો ક્યાંથી ખબર હોય ? એટલે આજે પ્રસ્તુત છે જેન-ઝિ માટેનાં થોડાં સુભાષિતો…

*** 

રાતે મોડા જે સૂએ

મોડ ઊઠે વીર

‘વ્યૂઝ’ ‘શેર’ અને ‘લાઈક’ વધે

ચાર્જિંગમાં રહે શરીર !

*** 

પિત્ઝા, બર્ગર ને મોમોઝ

એ ફાસ્ટ ફૂડ કહેવાય

ઘરમાં રાંધીને ખાય તેને

‘ઓલ્ડ-પિપલ’ કહેવાય !

*** 

નવે ઊઠો, અગિયારે નાસ્તો

ત્રણે લંચ ને બારે ડિનર

વચમાં વેફર, મેગી, ચિપ્સ

આ જ છે ફીટનેસની ટિપ્સ !

*** 

ગેમ રમાડે અંગૂઠો

અંગૂઠો કરે ચેટ

માઈન્ડ હંમેશાં ફ્રેશ રહે

બોડી રહે રિલેક્સ !

(બોલો, અંગૂઠાની જય !)

*** 

મોબાઈલને તું મિત્ર ગણ

મોબાઈલ તારો આત્મા

દેહ મરીને પડી જશે

પણ ‘હિસ્ટ્રી’ રહેશે હાથમાં !

*** 

‘ફેક’ કંઈ નથી દુનિયામાં

‘વર્ચ્યુઅલ’ એ જ સત્ય

મિરર કરતાં ‘સેલ્ફી’ સુંદર

બાકી સઘળું અસત્ય !

*** 

પ્રાયવસી-પ્રાયવસી શું કરો ?

ઘરમાં જ પ્રાયવસી હોય

મા-બાપ જે જાણે નહીં, તે

સઘળું ‘ઓનલાઈન’ હોય !

*** 

‘ઇન્સ્ટા’થી ઇન્ટ્રો મળે

‘સ્નેપચેટ’થી સંગ

‘ફેસબુક’ તો ફેમિલીનાં

‘ટિંડર’ બનાવે દબંગ !

*** 

ફોટા પર ફિલ્ટર ઘણાં

વિડીયોમાં પણ ‘ફેક’

ફૂંકી ફૂંકીને પ્રેમમાં પડીએ

અહીં બ્લેકમેઇલર અનેક !

*** 

શોધો ને ગુગલમાં જડશે

હોમવર્ક કરશે જીટીપી

એઆઈ ખાશે નોકરીઓ

પછી, તું વગાડજે સીટી !

***

- મન્નુ શેખચલ્લી