ઈયુ યાને કે યુરોપિયન યુનિયન સાથે થયેલા મુક્ત વેપાર કરારને બદલે ભારત સરકાર ‘તમામ કરારોની માં’ તરીકે ઓળખાવતી હોય..
પણ આપણા ફેસબુકના ખાંટુઓમાં કંઈ જુદી જ ચર્ચા ચાલી રહીછે ! જુઓ…
***
‘જોયું બોસ ? ટ્રમ્પ ઘીસ ખાઈ ગયો !’
‘ઘાસ ? ટ્રમ્પ ઘાસ ખાય છે ? ક્યારથી ?’
‘અરે, ઘાસને અંગ્રેજીમાં ‘ગ્રાસ’ કહેવાય છે અને અમેરિકન બોલીમાં ‘ગ્રાસ’ એટલે ચરસ ! ગાંજો ! અફીણ !’
‘અચ્છાઆઆ… આ બધું પેલા વેનેઝુએલાના માદુરોને પકડ્યો ત્યારે મળ્યું હશે ! એ ડ્રગ્સનો ધંધો કરતો હતો ને ?’
‘અરેએએ !! ઘાસ નહીં ઘીસ… ઘીસ !’ મોદી સાહેબે ઈયુ સાથે કરાર કર્યા ને ? એની વાત કરું છું !!'
‘ઈયુ ? એ વળી કીયું પ્રાણી ?’
‘યાર, આ અભણને કોઈ સમજાવો ! ઈયું પ્રાણી નથી ! ઈયુ એટલે યુરોપિયન યુનિયન ! એનાં વડાં અહીં આવ્યાં હતાં !’
‘ઓહો ? મોદીજી અહીં બેન્ક કર્મચારીનાં યુનિયનને ભાવ પણ નથી આપતા અને પેલા યુરોપિયન યુનિયન લીડર જોડે ફોટા પડાવે છે ? પ્રસિદ્ધિનો મોહ માણસને ક્યાં લઈ જાય છે ?’
‘અરે યાઆઆર ! આ અભણને -’
‘અભણ અભણ ના કરો ! હું પણ એડ્મિન છું !’
‘અરે, ભારતના કાયદાની વાત છે. યુરોપના દેશો સાથે જે કરાર થયા એમાં યુરોપિયન કારો સસ્તી થઈ જવાની !’
‘શું વાત કરો છો ? આપણે નવી લેવાની જ છે.’
‘જુઓ, બીએમડબલ્યુ ૮૭ લાખને બદલે ૫૭ લાખમાં પડશે અને અઢી કરોડની ઓડી હવે દોઢ કરોડમાં આવશે !’
‘લો બોલો, મેં આ દશેરાને દિવસે જ નવી ગાડી છોડાવી ! આવી ખબર હોત તો -’
‘રહેવા દો ભઈ ! દશેરાને દહાડે તમે સ્કૂટર લીધું છે ! એ પણ લોનથી !’
‘પણ આમાં તો અંબાણી અદાણી કે સલમાન શાહરૂખ ટાઈપના લોકોની ઇજ્જત જ ના રહી ને ?’
‘શી રીતે ?’
‘કારના ભાવ જ ઘટી ગયા ! હવે તો છાપામાં ય નહીં આવે !’
‘હું તો પહેલાંથી જ કહેતો હતો ! આ મોદી સરકાર અમીરોને પણ ગરીબ બનાવી દેશે ! જોયું ને ?’
***
- મન્નુ શેખચલ્લી
Comments
Post a Comment