આટલા દિવસો પછી પણ ઇન્ડિગોની બબાલથી છૂટકારો મળતો નથી ! દરમ્યાનમાં ભાજપિયા ભક્તોના એક વોટ્સએપ ગ્રુપમાં શું ચર્ચા ચાલી રહી છે ? સાંભળો…
***
‘હવે આ ઇન્ડિગોનું શું કરવાનું છે, કોઈ કહેશો ?’
‘કેમ, હવે શું છે ? પતવા તો આવ્યું.’
‘પણ આ રીતે સળી કરી જાય એ તો ના ચાલે ને ?’
‘સળી ? કેવી સળી ?’
‘અરે જોયું નહીં ? બરાબર પુતિન સાહેબ આપણા સાહેબને મળવા આવ્યા એ જ દિવસથી ધડાધડ ફ્લાઈટો કેન્સલ કરવા માંડી ! આનાથી આખા વર્લ્ડમાં ભારતની બદનામી ના થઈ ?’
‘હું તો કહું છું કે ‘બોયકોટ ઇન્ડિગો’ની ઝુંબેશ ચાલુ કરી દો !’
‘ઓ ભઈ ! અહીં ઓલરેડી હજારો ફ્લાઈટો કેન્સલ થવાથી લાખો લોકો હેરાન થયા છે ! એમાં વળી બોયકોટ ક્યાંથી લાયા?’
‘કેમ, માલદીવ વખતે બોયકોટ નહોતું ચલાવ્યું ? ચાઈના વખતે બી…’
‘ના ભઈ ના, બોયકોટ કેન્સલ. બીજું વિચારો.’
‘હું શું કહું છું ? ઇન્ડિગોના માલિકને બદનામ કરી નાંખો ! ઇન્ડિગો કંપનીના શેર ગગડાવી નાંખો ! દેશદ્રોહી… દેશદ્રોહી… કરીને હાહાકાર મચાવી દો !’
‘એક મિનિટ ! માનનીય વડાપ્રધાન શ્રી એવું બોલ્યા છે કે નિયમો એટલા બધા કડક પણ ના હોવા જોઈએ કે એનો અમલ ના કરી શકાય.’
‘સાચી વાત છે. પણ અહીં ટ્રાફિક પોલીસવાળા પણ ક્યાં સમજે છે ? મને વારંવાર વગર હેલ્મેટે પકડીને ૫૦૦ કઢાવે છે.’
‘ખરી વાત છે. ગુજરાતમાં દારૂબંધીના નિયમોનું પણ સાહેબને કહેવું જોઈએ.’
‘આ કોણે લખ્યું ? ડિલીટ કરો, ડિલીટ કરો !’
‘પણ ઇન્ડિગોનું શું કરવાનું ? કંઈ ગાઈડલાઈન આપો ને ?’
‘તમે જરા સમજો યાર. ઇન્ડિગોએ ૩૬ કરોડનાં ઇલેક્ટરોલ બોન્ડ લીધેલાં છે.’
‘ઓ ભઈ ! ૩૬ કરોડ તો ચણા મમરા કહેવાય ! અહીં માત્ર શટલ રીક્ષાના હપ્તા -’
‘યાર, આને ડિલીટ કરો કોઈ ?’
‘એમ નહીં, પેલી દિલ્હીની હાઈકોર્ટ સરકારનો ઉધડો લઈ નાંખ્યો!’
‘તો આપણે ઇન્ડિગોનો ઉધડો લઈ લો ને ?’
‘હું તો કહું છું હાઈકોર્ટનો પણ ઉધડો લેવો જોઈએ કે તમે ઇન્ડિગોનો ઉધડો કેમ નથી લેતા ? આ કોર્ટો બેફામ થતી જાય છે.’
‘અરે યાર, આને ડિલીટ કરો ! એડમિન ક્યાં ગયા ?’
‘એ તો થાઈલેન્ડ ગયા છે, ઇન્ડિગોની ફ્લાઈટમાં !’
***
- મન્નુ શેખચલ્લી
Comments
Post a Comment