આવનાર વર્ષમાં જાણીતી સેલિબ્રિટીઓને આપણે ડીએમ (ડાયરેક્ટ મેસેજ) તો કરી શકતા નથી. (કરીએ તોય એ ક્યાં નવરા છે, વાંચવા માટે ?) એટલે આ રીતે જાહેરમાં જ શુભેચ્છાઓ પાઠવી લઈએ…
***
કરણ જોહરને શુભેચ્છા કે આવનારા વરસમાં એનાં બેસી ગયેલા ગાલ થોડા ફૂલેલા દેખાય…
અને આદર પૂનાવાલાને શુભેચ્છા કે એમના ૧૦૦ કરોડનું એકાદ બે કરોડ વળતર પણ મળે કરણ જોહર પાસેથી !
***
અર્જુન કપૂરને શુભેચ્છા કે એનો એકાદ ‘હિટ એન્ડ રન’ કેસ થાય !
કેમકે થિયેટરોમાં નહીં તો છેવટે સડક ઉપર તો એકાદ ‘હિટ’ મળે ? અને ફિલ્મ નહીં તો કાર, ‘રન’ તો થાય ?
***
એ જ રીતે કંગના રાણાવતને શુભેચ્છા કે એના સરકારી બંગલામાં અસંખ્યા માખીઓનો ત્સ વધી જાય !
જેથી કંગનાબેનને કંઈ ‘કામ’ તો મળે ?
***
વિરાટ કોહલી અને રોહિત શર્માને શુભેચ્છાઓ કે આવનારા વરસમાં એમને ગોલ્ફની ગેમમાં અનેક ઇનામો અને ટ્રોફીઓ મળે!
કેમકે એ સિવાય તો આ બે જણા ક્રિકેટમાંથી રિટાયર થવાના નથી…
***
અને પાકિસ્તાન ક્રિકેટ બોર્ડના ચેરમેન નકવીને શુભેચ્છા કે તેમને રોહિત અને વિરાટની ટ્રોફીઓ પણ ચોરીને ઘરે લઈ જવાની તક મળે !
કેમકે એ સિવાય તો એમને પણ કોઈ એટેન્શન મળતું નથી…
***
અમેરિકાના ટ્રમ્પને શુભેચ્છાઓ કે આખા વરસ દરમ્યાન અમેરિકામાં સતત ‘અશાંતિ’ જ રહે !
કેમકે એ એક જ રીતે દુનિયાના બાકીના દેશોમાં ‘શાંતિ’ રહે એવું છે…
***
અને મોદીજીને શુભેચ્છા કે આવનારા એક વરસનું નહીં, અનેક વરસ સુધી રાહુલજી જ કોંગ્રેસના આગેવાન રહે !
કેમકે એમાં જ બંનેનો ફાયદો છે !
હેપ્પી ન્યુ યર !
***
- મન્નુ શેખચલ્લી
Comments
Post a Comment