ફટાકડા માત્ર આઠથી દસમાં ?

ગુજરાત સરકારે ગાઈડલાઈન બહાર પાડી છે કે આપણે દિવાળીના તહેવારોમાં માત્ર ૮ થી ૧૦ વચ્ચે જ ફટાકડા ફોડવાના છે ! હવે જો આનો ખરેખર કડકાઈ અમલ થશે… તો ?

*** 

તો શું આપણે ફટાકડા ખરીદતી વખતે ‘સોગંદનામું’ લખી આપવું પડશે કે ‘હું ફલાણા ફલાણા, આધારકાર્ડ નંબર ફલાણા, રહેઠાણ ફલાણા. આથી ખાતરી આપું છું કે આ ફટાકડા…’ વગેરે વગેરે ?

*** 

અને જો એ ફટાકડા કોઈ બીજી જ વ્યક્તિ ફોડતાં પકડાય તો શુ પોલીસ ફરિયાદ નોંધાવવાની કે, ‘મજકુર શખ્સ મારા ઘરમાંથી સદરહુ ફટાકડા ચોરી ગયો હતો…?’

*** 

અચ્છા, મોબાઈલ વડે જો તમે સૌને ફટાકડા ‘ફૂટતા હોય’ એવા હેપ્પી દિવાલીના મેસેજો મોકલતા હશો, તો શું નીચે ચેતવણી લખવી પડશે કે –

‘આ મેસેજ રાતે ૮ થી ૧૦ વચ્ચે જ ખોલવો… નહીંતર જો પોલીસ કેસ થાય તો અમારી જવાબદારી નથી ! હા..’

*** 

જો આમ જ ચાલ્યુ તો ભવિષ્યમાં એવી જાહેરાતો પણ આવશે કે –

‘રોજના ૫૦૦ થી ૫૦૦૦ બાવો ! સળંગ બે કલાક સુધી નોન-સ્ટોપ’ જોરદાર અવાજે ફટાકડા ફૂટ્યા જ કરતા હોય એવી ‘ઓડિયો-ફાઈલ’ ડાઉનલોડ કરી લો… માત્ર ૧૦૦ રૂપિયામાં ! પછી ઉત્તરાયણની જેમ મોબાઈલના સ્પીકરો સાથે જોડીને પ્રદૂષણ નિવારણ ઝુંબેશમાં જોડાઈ જાવ !

*** 

અમુક સેવાભાવી સજ્જનો કહે છે કે ભલે આપણે ફટાકડા ફોડીએ નહીં, પણ કારીગરોને રોજી મળે એટલા ખાતર ફટાકડા  ખરીદવા તો જોઈએ જ !

સવાલ એ છે કે વડીલ, એ ફટાકડા ખરીદીને કરવાનું શું ? પાણી છાંટીને શો-કેસમાં મુકી રાખવાનાં ? કે એનાં તોરણ બનાવવાનાં ?

*** 

ચાર વરસ પહેલાં ચીનથી ન્યુઝ આવ્યા હતાં કે એ લોકો જરાય ધૂમાડો ના થાય એવા ફટાકડાની શોધ કરવાના હતા…

- પછી એનું શું થયું ? સાવ આળસુ છે ચીનાઓ !

*** 

અને હલો, આ ‘ફટાકડા’ અને ‘દારૂખાનું’ એ બે અલગ અલગ ચીજો જ થઈ ને ?

- આ તો જસ્ટ ‘ડ્રાય’ સ્ટેટવાળા ગુજરાતી તરીકે એક સવાલ થાય છે !

***

- મન્નુ શેખચલ્લી