એક દિવસ મંત્રીજીએ જાહેર કર્યું કે, ‘તમારા વિસ્તારના રોડ પર ખાડો પડ્યો હોય તો ફોટા પાડીને અમને મોકલી આપો… અમે કાર્યવાહી કરીશું….’
પછી શું થયું ? જુઓ…
***
‘મંત્રીજી, આ જુઓ…’
સાહેબના આસિસ્ટન્ટે કોમ્પ્યુટરમાં બતાડ્યું. ‘આ એક ભાઈએ એક સામટા એક હજાર બસ્સો ને પાંત્રીસ ખાડાના ફોટા મોકલી આપ્યા છે !’
‘કોઈ નવરો માણસ લાગે છે ! આખા શહેરમાં ફરી ફરીને ફોટા પાડ્યા લાગે છે.’
‘ના સાહેબ ! એક જ રોડના ફોટા છે !’
‘હેં ?’
‘હા ! એક જ રોડ ઉપર એક હજાર બસ્સો ને પાંત્રીસ ખાડા પડ્યા છે !’
***
મંત્રીજીએ હુકમ કર્યો ‘એવું તો હોતું હશે ? કોઈ પ્રોફેશનલ ફોટોગ્રાફરને કહો કે એ રોડના ખાડાના ફોટા પાડીને મોકલે.’
બીજા દિવસે આસિસ્ટન્ટે કહ્યું ‘સાહેબ, આ એક જ ફોટો આવ્યો છે !’
‘જોયું ? મેં નહોતું કીધું ?’
‘હા, પણ ડ્રોન વડે પાડેલા આ એક હાઈ રિસોલ્યુશન ફોટામાં ખાડા વધારે છે.’
‘કેટલા છે ?’
‘એટલા જ છે ! એક હજાર બસ્સો ને પાંત્રીસ !’
મંત્રીજી હવે ટેન્શનમાં…
***
ત્યાં તો એ પછીના દિવસે આસિસ્ટન્ટ દોડતો આવ્યો : ‘ખુશશબરી છે, સાહેબ ખુશખબરી !’
‘શું છે, ખુશખબરી?’
‘સર, હવે ત્યાં એક પણ ખાડો નથી !’
‘વાહ ! જોયું, આપણું તંત્ર કેટલું ઝડપી કામ કરે છે !’
‘એવું નથી સર.’
‘તો ?’
‘સર, ગઈકાલે રાત્રે જે ત્રણ ઇંચ નવો વરસાદ પડ્યોને, એમાં કરોડોના ખર્ચે બનેલો આખો રોડ જ ધોવાઈને વહી ગયો છે !’
***
- મન્નુ શેખચલ્લી
Comments
Post a Comment