મહિલાઓનું પુરુષીકરણ રોકો !

જ્યાં સુધી મહિલાઓનું સશક્તિકરણ કરવાની વાત છે ત્યાં સુધી તો બધું બરોબર જ હતું પણ જ્યાં મહિલાઓને ‘પુરુષ સમોવડી’ બનાવવાનું તૂત ચાલ્યું છે ત્યાં બહુ મોટા લોચા છે ભૈશાબ !

આ મહિલા ક્રિકેટનો જ દાખલો લ્યો ને ? T20 મહિલા કપની મેચો અમે એટલા માટે જોતા હતા કે આપણી મહિલા ટીમ ફાઈનલમાં પહોંચે તો એ બહાને આપણે પોતપોતાની પત્નીઓ પાસે પાર્ટીઓ માગી શકીએ ! એટલું જ નહીં, આપણા ભાયડાઓની મેચોમાં પણ એમને રસ પડે તો આગળ જતા આપણાં રિમોટો છીનવાય નહીં !

ખેર, મહિલા ટીમ તો ફાઈનલમાં ના પહોંચી પણ એ જ ખેલાડીઓને જ્યારે અમે કપિલ શર્માના શોમાં જોઈ ત્યારે દંગ થઈ ગયા કે બોસ, આ બધીઓ આટલી બ્યુટિફૂલ અને સ્ટાઇલિશ છે ? કોઈકે વાળમાં જેલ લગાવીને શેપ આપેલો તો કોઈનો મેકપ જોઈને જ આપણાં ડાંડિયા ડૂલ થઈ જાય એવું હતું !

સવાલ એ છે કે બહેનો, જ્યારે તમે મેદાનમાં હોવ છો ત્યારે આ બધું કેમ ગાયબ થઈ જાય છે ? શા માટે તમે કોહલીઓ, શર્માઓ અને સૂર્યકુમારો જેવાં ટી-શર્ટ અને ટ્રાઉઝર પહેરીને હાલ્યાં આવો છો ? (ઉપરથી ટી-શર્ટની સાઈઝો પણ કોહલીઓ, શર્માઓ અને સૂર્યકુમારો જેવી જ હોય!) અમારો વાંધો એ છે કે જો ટેનિસમાં સાનિયા મિર્ઝાઓ અને બેડમિંગ્ટનમાં પીવી સંધુઓ સરસ મઝાનાં ફ્રોક પહેરી શકતી હોય તો ક્રિકેટમાં કેમ નહીં ? 

ચાલો માન્યું કે પગ ઉપર પેડ પહેરવાં પડે, પણ તો, સલવાર કમીઝ પણ પહેરી શકાય ને ? અને ભલે, ટી-શર્ટ ટ્રાઉઝરો પહેરવાં હોય તો પહેરો પણ આવાં લફડ-ફફડ શા માટે ? શું દિપીકા પદુકોણો અને કિયારા અડવાણીઓની સ્ટાઈલો નથી અપનાવી શકાતી ? (જો એમ હોત તો વિમેન્સ IPL માટે જેની બોલી માત્ર 3 કરોડની લાગી હતી એમની શરૂઆત જ 12-15 કરોડથી થઈ હોત ! બોલો ખોટું કીધું ?)

આવો જ લોચો ન્યુઝ ચેનલોમાં વરસોથી ચાલી રહ્યો છે. અરે બહેન, તમારી પાસે પહરેવા માટે લાલ-કાળા-ભૂરા કોટ સિવાય બીજું કંઈ છે જ નહીં ? અને કોટ ઠઠાડ્યો એટલે એની અંદર શર્ટ કે ટી-શર્ટ પ્લેઇન જ હોય ! એ પણ સફેદ કે લાલ જ ! હેર-સ્ટાઈલો પણ એની એ જ ! આ ન્યુઝ-ચેનલોના માલિકો TRP… TRP… કરતાં વ્યુઅરશીપની પાછળ આટલા દોડે છે તો સાહેબો, ફક્ત તમારી એન્કરોનાં કપડાં અને હેર-સ્ટાઈલોમાં ‘મહિલાકરણ’નો ટચ ઉમેરો તો એની મેળે સૌની TRP વધી જશે ! કેમકે માત્ર પુરુષો જ નહીં હવે તો બહેનો પણ એ જોવા માટે ચેનલ ઉપર આવશે કે આજે ફલાણીએ શું પહેર્યું છે !

દુરદર્શનના જમાનામાં તો ન્યુઝ રીડરો સાડીઓ જ પહેરતી હતી પણ આજે તમને કઈ ભારત સરકારની ગરિમા નડે છે કે ન્યુઝ રીડરો સ્લીવલેસ બ્લાઉઝ અને શિફોનની સાડી પહેરીને પણ સમાચારો ના વાંચી શકે ? અરે, તહેવારો હોય ત્યારે તો કેવી રંગત જામે ! નવરાત્રિના નવે નવ દિવસ આપણી મહિલા ન્યુઝ એન્કરો મસ્ત મસ્ત ચણિયા ચોળી પહેરીને આવે ! અને તો પછી બેઠી બેઠી સમાચારો શેની વાંચે ? મોટા ઘેરવાળો ઘાઘરો લહેરાવીને ફૂદડી ફરતાં જ ન્યુઝ ના આપે ? (બેક-લેસ ચોલી પણ તો જ દેખાય ને ?)

સ્હેજ આંખો બંધ કરીને કલ્પના તો કરો… આહાહા… ઓણમના તહેવારે વાળમાં મોટી મોટી વેણીઓ અને કાંજીવરમ સાડીઓ… ગણેશોત્સવ ટાણે મસ્ત મરાઠી નવ-વારી સાડીઓ સાથે ડેકોરેટીવ પાઘડીઓ (ગોગલ્સ પણ ખરા!)… અને દિવાળીના દિવસોમાં તો ભભકાદાર ટ્રેડિશનલ સાડીઓની રીતસર હરિફાઈ ચાલતી હોય એવું લાગે ! જો ન્યુઝ ચેનલોના ભેજામાં અમારો આઇડિયા ક્લિક થાય તો હાલમાં જે કાળા-ભૂરાં કોટ અને બ્લેઝરો પહેરે છે ને, એનો વારો ફક્ત ક્રિસમસ વખતે જ આવે. બોલો સેક્યુલરિઝમની જય !

તમને ભલે અમારી વાતો શેખચલ્લીના હવાઈ કિલ્લા જેવી લાગતી હશે, પણ મને કહો, મહિલા કેબ-ડ્રાઈવરોને ખાખી શર્ટ, ખાખી પેન્ટ અને માથે કેપ પહેરાવવામાં કયું લોજિક છે ? શું કેબ-કંપનીઓના માલિકોએ ભારતમાં સરસ મજાની મોંઘી સાડી પહેરીને કાર ચલાવતી મહિલાઓને જોઈ જ નથી ? આવું જ મહિલા રીક્ષા ડ્રાઈવરોનું છે. શું એ ડ્રાઈવર બહેનો શહેરમાં સ્કુટી અને સ્કુટરો ચલાવતી મહિલાઓની જેમ ચહેરા ઉપર બુકાની બાંધીને ‘મહિલા ફેશન’ ના અપનાવી શકે ? (અહીં તમે ખાસ માર્ક કરજો, ભરઉનાળો હોવા છતાં કોઈ ભાયડો પોતાના ચહેરા ઉપર સાદો નેપકિન પણ બાંધીને નીકળે છે ?)

આ તો તમને અત્યારથી ચેતવી રહ્યા છીએ, નહિતર એક દિવસ એવો આવશે કે મહિલા ટ્રાફિક પોલીસો નકલી દાઢી-મૂછ રાખતી હશે ! તમે એની સામું આંખો ફાડીને જોયા કરતા હશો તો એ ભારે અવાજે કહેશે ‘ક્યું ? કભી કોઈ લડકી કો દાઢી મેં નહીં દેખા ક્યા ?’

***

- મન્નુ શેખચલ્લી

E-mail : mannu41955@gmail.com