લોકો ભલે કહેતા કે ‘સાઠે બુધ્ધિ નાઠી’… પણ સાવ એવું નથી ! સિકસ્ટી પ્લસ હોવાના ઘણા ફાયદા છે ! જુઓ…
***
એક તો, તમે જિંદગીમાં કોઈ મોટી ધાડ ના મારી હોય છતાં યંગસ્ટરો તમને પગે પડે છે !
***
બીજું, તમે કોઈ પીએચડી ના કરી હોય, કોઈને ઊઠાં પણ ના ભણાવ્યાં હોય, છતાં આજકાલના જુવાનિયા તમને ‘સર’ કહે છે ! (તમારે એમ સમજવાનું કે આ અંગ્રેજોએ આપેલો ઇલ્કાબ છે.)
***
બસમાં, ટ્રેનમાં કે કોઈપણ ભીડ ભરેલા ફંકશનમાં તમે જરીક ખોં ખોં… કરીને ઢીલા થઈ જવાનો દેખાવ કરો કે તરત જ બેસવા માટે સીટ મળી જાય છે !
***
સામેવાળી વ્યક્તિ તમને બોર કરતી હોય તો વારેઘડીએ કાન ઉપર હથેળી રાખીને ‘હેં… ? હેં…?’ કર્યા કરો તો પેલો એની મેળે ચૂપ થઈ જાય છે !
***
જીવન વીમાની પોલીસી, મેડિક્લેઈમ… આ બધાનું હવે સાચું ‘રિટર્ન’ મળવા લાગે છે !
***
તમે જે કંઈ નવી ખરીદી કરશો એ હવે તૂટી જાય, ઘસાઈ જાય કે ફાટી જાય એની ચિંતા જ ના રહી ! સમજો ને, ‘લાઈફ-ટાઈમ’ ગેરંટી છે !
***
તમે ભલે વહુ કે દિકરાએ ઘર શી રીતે ચલાવવું એની શીખામણો ના આપી શકો, પણ મોદીએ દેશ કેવી રીતે ચલાવવો જોઈએ એની સલાહ છડેચોક આપી શકો છો !
***
હવામાન ખાતુ આગાહી કરે એ પહેલાં જ તમારા શરીરના દુઃખતા સાંધા આગાહી કરી શકે છે !
***
અને શાકભાજી લાવવી કે છોકરાં રમાડવા જેવા ફાલતુ કામો સિવાય કોઈ જવાબદારીનું કામ તમને સોંપાતું જ નથી ! બોલો, કેટલી શાંતિ !
***
- મન્નુ શેખચલ્લી
Comments
Post a Comment