લો, યુક્રેન-યુદ્ધ અને ચૂંટણી વિષ્લેષણના સમાચારો વાંચીને કંટાળ્યા હો તો થોડા નવા, તાજા અને સાવ બોગસ ફેક-ન્યુઝની મજા લો…
***
પાકિસ્તાનનું મિસાઇલ ભૂલથી પાકિસ્તાનમાં જ તૂટી પડ્યું
ભારતમાંથી ભૂલથી છૂટી ગયેલા મિસાઇલનો જડબાતોડ જવાબ આપવા માટે પાકિસ્તાને રાવલપિંડીના આર્મી બેઝથી એક મિસાઇલ ભારત તરફ છોડ્યું હતું પણ ટેક્નિકલ લોચાને લીધે તે પાકિસ્તાનના જ એક ગામડામાં તૂટી પડ્યું હતું. આના કારણે એ ગામના બે બકરાઓ મરી ગયા હતા અને ચાર મરઘીઓ ઘાયલ થઈ હતી.
***
ઇમરાન ખાનની સરકાર ઉથલાવવા માટે અમિત શાહ હરકતમાં
23 માર્ચે પાકિસ્તાનની નેશનલ એસેમ્બલીમાં જે અવિશ્વાસનો પ્રસ્તાવ આવવાનો છે. એમાં ઇમરાન ખાનની સરકારને ઉથલાવી નાંખવા માટે ભારતના ચેમ્પિયન ઉથલાઉકાર અમિત શાહનો સંપર્ક સાધવામાં આવ્યો છે.
ગુપ્ત અહેવાલના જણાવ્યા મુજબ 18મી માર્ચે હોળી-ધૂળેટીના બહાને વિરોધપક્ષના અમુક નેતાઓ ચહેરા ઉપર રંગ ચોપડીને છૂપા વેશે ભારતમાં આવશે અને અમિત શાહને ગુપ્ત જગ્યાએ મળીને આખો પ્લાન શીખી લેશે.
***
યુપી કોંગ્રેસના બે વિધાયકોને વીરતા પુરસ્કાર આપવામાં આવશે
યુપીમાં કોંગ્રેસના 400 જેટલા ઉમેદવારોમાંથી માત્ર બે જ બહાદૂર ઉમેદવારો એવા નીકળ્યા છે જે ભાજપા અને સપા સામે ટક્કર ઝીલી શક્યા છે. યુપીમાંથી આ જે બે કોંગ્રેસી ઉમેદવારો રાહુલ ગાંધી તથા પ્રિયંકા ગાંધીના પ્રચાર કરવા છતાં ચૂંટણી જીતી ગયા છે તેમનું વીરતા પુરસ્કારો દ્વારા ખાસ સન્માન કરવામાં આવશે.
આ સમારંભમાં, 1984ની લોકસભામાં જે બે ભાજપાના ઉમેદવારો જીત્યા હતા, તેમની તસવીરો મંચ ઉપર રાખવામાં આવશે. જેથી કોંગ્રેસની આવનારી પેઢીને એમાંથી પ્રેરણા મળતી રહે !
***
- મન્નુ શેખચલ્લી
Comments
Post a Comment