‘પુષ્પા : ધ રાઇઝ’ નામનું પિક્ચર હિટ થયા પછી સોશિયલ મિડીયામાં એનાં ફની મિમ્સ અને ફની વિડીયોઝનો જે રાફડો ફાટ્યો છે એ તો કંઈ નથી. આગળ જતાં આ ‘પુ્ષ્પા ઇફેક્ટ’ ક્યાં ક્યાં પહોંચવાની છે એનો તમને જર્રાય અંદાજ નથી, બોસ !
હમણાં ગઇકાલે જ મને એક જુવાનિયો મળી ગયો. એનું મોં સુજેલું હતું. કપાળે મોટું ઢીમચું હતું. ગાલ ઉપર રીતસરના છ નંબરના સેન્ડલની પ્રિન્ટો છપાયેલી દેખાતી હતી. મેં પૂછ્યું ‘અલ્યા શું થયું ?’
તો કહે ‘વેલેન્ટાઇન ડેના દિવસે એક છોકરીને 500 રૂપિયા આપીને એક કીસ માગી, તો એણે - ’
એ બિચારો રડવા જેવો થઈ ગયો હતો. મેં એના ખભે હાથ મુકી આશ્વાસન આપતાં કહ્યું ‘હશે, બીજી કોઈ છોકરી આગળ ટ્રાય કરી જોજે…’
તો એ બિચારો રીતસર રડી પડ્યો અને કહેવા લાગ્યો : ‘મન્નુભાઈ ત્યાં બીજી છ છોકરીઓ ઊભી હતી. બધીએ મને સેન્ડલે સેન્ડલે મારીને કહ્યું, ડફોળ જાણતો નથી ? ભાવ 5000નો ચાલે છે ! અને તું 500 રૂપિયા લઈને હાલી નીકળ્યો છે ?’
લો બોલો. આને કહેવાય ‘ધ પુષ્પા ઇફેક્ટ’ !
હજી તો શરૂઆત છે. આ નવરાત્રિમાં તમે જોજો ‘પુષ્પા સ્ટેપ’ નીકળવાનાં છે ! સેંકડો છોકરાઓ એક પગ ઢસડી ઢસડીને ગરબા ગાશે ! એમાં ભલભલી સોસાયટીઓના કોમન પ્લોટોમાં ગોળ ગોળ કુંડાળાના શેપમાં ખાડા પડી જવાના છે !
એ તો ઠીક, પેલા પાર્ટી પ્લોટોની જમીન ઉપર જે લીલા રંગના પ્લાસ્ટિકંનાં કપડાં ખીલીઓ વડે ઠોકીને રાખે છે ને, એમાં તો ઘસારાને કારણે મોટાં મોટાં બાકોરાં જ પડી જવાનાં છે !
નવરાત્રિમાં ‘તેરી ઝલક અશર્ફી શ્રીવલ્લી’નાં રિ-મિક્સ ગરબા તો આવવાના જ છે પણ એ પહેલાં એ જ ઢાળમાં ભજનો પણ આવી ગયાં હશે ! ‘તેરી ઝલક શિવજી…!!’
ટેન્શન અમને ફક્ત એટલું જ છે કે મંદિરની આસપાસ પ્રદક્ષિણા કરતી વખતે ભક્તો ટાંટિયા ઢહડીને ચાલશે તો કેવું લાગશે ? અને જે રીતે અમુક લોકો માતાજીની પૂનમ ભરવા માટે રોડ ઉપર ગબડતા ગબડતા જાય છે એ રીતે આખેઆખાં જુવાનિયાનાં ઝૂંડો પગ ઢહૈડતા જતાં જોવા મળે તો નવાઈ જ નહીં !
ડોક્ટરો, ખાસ કરીને ઓર્થોપેડિક ડોક્ટરોને તો અત્યારથી ચિંતા થવા લાગી છે. કેમકે બે જાતનાં હાડકાંના રોગો આવી રહ્યા છે !
એક રોગનું નામ છે ‘ધ પુષ્પા ટ્વિસ્ટ’. આમાં બિમાર માણસ પેલા અલ્લુ અર્જુનની જેમ ત્રાંસી સ્ટાઇલો મારીને ચાલવાને કારણે પોતાનો એક ખભો ત્રાંસો કરી બેસે છે !
બીજો રોગ પણ આવવાનો છે. એનું નામ છે ‘ધ પુષ્પા સ્પાઇન’. આમાં જે બધાં ફાંકોડીઓ ટણીમાં ને ટણીમાં ‘મૈ ઝૂકેગા નહીં’ કહેતા થઈ ગયા છે એમની કરોડરજ્જુઓ સીધી જ રહી જવાની છે ! બિચારાઓ પોતાના પાયજામા કે જિન્સ પહેરવા માટે પણ કમરથી ઝૂકી શકશે નહીં !
અને હજી ઊભા રહો. એ જ ‘મૈં ઝૂકેગા નહીં’ની ટણીનો ચેપ ફેલાવાને કારણે આખા ઉત્તર ભારતમાં નવું ફેશનવેવ શરૂ થશે. જેનું નામ હશે ‘ધ પુષ્પા લુંગી !’
જી હા, ‘ઝુક્યા’ વિના તો એ જ વસ્ત્ર પહેરી શકાશે ને ?
વિરાટ કોહલી અને વિકી કૌશલ જેવી સેલિબ્રિટીના કારણે યુવાનોમાં દાઢી રાખવાની ફેશન તો ચાલી જ છે પણ આ પુષ્પાની અલ્લુ-સ્ટાઇલના કારણે દાઢીમાં ખાસ ઝીણી ઝીણી ‘જૂ’ પાળવાનાં ક્રીમ પણ મળતાં થઈ જશે !
જેથી તમે અલ્લુ અર્જુનની જેમ દાઢીમાં આંગળીઓ ઘૂસાડીને બોલી શકો કે ‘મૈં ઝૂકેગા નહીં !’
આ ક્રીમની એજન્સી જોઈતી હોયતો અમને કહેજો. સાઉથનો એક ‘લલ્લુ અર્જુન’ આપણને ઓળખે છે.
***
-મન્નુ શેખચલ્લી
E-mail : mannu41955@gmail.com
Comments
Post a Comment