છેલ્લાં બે વરસમાં આખી દુનિયાની પથારી ફરી ગયા પછી હવે આપણને ‘હેપ્પી ન્યુ યર’ના જે મેસેજો આવે છે એ પણ નેતાઓનાં વચનો જેવાં લાગે છે ને ! એટલે જ અમે અમારા પોતાના મનોરંજન ખાતર 2022માં મઝા આવે એવી ઘટનાઓની કલ્પના કરી છે…
***
2022માં કેવી મઝા આવે… જો માર્ચ મહિનામાં કોરોનાનો જબરદસ્ત હૂમલો થાય, પરીક્ષાઓ કેન્સલ થઈ જાય, બધાને માસ પ્રમોશન મળી જાય અને પછી અચાનક એપ્રિલમાં કોરોના ગાયબ થઈ જાય !
***
અને કેવી મઝા આવે.. જો ટીવીમાં ‘સાસ ભી કભી બહુ થી’ ફરી શરૂ થઈ જાય અને એમાં સ્મૃતિ ઇરાની મોટી વડ-સાસુ બનીને આવે અને એકતા કપૂર પાસે આખા બંગલામાં સેનિટાઇઝરનાં પોતાં કરાવે !
***
અરે, કેવી મઝા આવે… જો ટીવીમાં રાહુલ બાબાનાં લગ્ન માટેનો રિયાલિટી શો શરૂ થાય, જેમાં એમની સાથે પરણવા તૈયાર થયેલી સેંકડો કન્યાઓ વચ્ચે જોરદાર હરિફાઈ જામે ! અને છેવટે એ શોને વરસના બેસ્ટ ‘કોમેડી’ શોનું ઇનામ મળે !
***
કેવી મઝા આવે… જો વિજય માલ્યાને ભારતમાં પાછો લાવવામાં આવે, અને એ દિવસે આખા દેશમાં જ નહીં, ગુજરાતમાં પણ એક દિવસ માટે દારૂ ઉપરથી પ્રતિબંધ ઉઠાવી લેવામાં આવે !
***
અને કેવી મઝા આવે… કે જે દિવસે નીરવ મોદીને પકડીને ભારતમાં લાવવામાં આવે એ દિવસને ‘રાષ્ટ્રિય બેન્ક ફ્રોડ દિવસ’ તરીકે મનાવવા માટે દરેકના ખાતામાં 15-15 લાખ જમા થઈ જાય ! (પછી ભલે એના માટે કોઈએ બહુ મોટો બેન્ક-ફ્રોડ કર્યો હોય.)
***
બાકી કેવી મઝા આવે… જો ભારતમાં કોઈ કોન્ફરન્સ માટે આવેલો ઇમરાન ખાન સાડી સત્તર વાર માગે છતાં એને જમવામાં ‘કાશ્મીરી પુલાવ’ હરગિઝ ના આપવામાં આવે… અને આખરે ત્યારે જ આપવામાં આવે જ્યારે ઇમરાન ખાન જાહેરમાં ‘ભારત માતા કી જય’ બોલીને બતાવે !
***
એમ તો કેવી મઝા આવે…. જો બાબા રામદેવ કોઈ ભેદી-વિચિત્ર વાયરસની ઝપેટમાં આવીને સખત રીતે બિમાર પડી જાય ! અને એમને સારવાર માટે વિદેશ લઈ જવા પડે… જ્યાં તપાસ કરાવવાથી ખબર પડે કે બાબા રામદેવ પોતે પોતાની જ પતંજલિ બ્રાન્ડની રોગ-પ્રતિકારક શક્તિ વધારનારી દવાઓ ‘નહોતા’ લેતા એટલે જ આવું બધું થયું !
***
અને બોસ, કેવી મઝા આવે.. જો પાકિસ્તાનના ટીવીમાં કોઈ કોમેડી-શોના હોસ્ટ તરીકે નવજોત સિધ્ધુને બેસાડી દીધા હોય અને એમને કોઈપણ જોક ઉપર હસવું જ ના આવતું હોય ! આખરે ભારત-પાક વચ્ચે ખાસ ‘શાંતિ-કરાર’ કરીને એમને ફરી હસાવવા માટે અહીંથી ખાસ રાહુલ બાબાને ત્યાં મોકલવા પડે !
***
જરા વિચારો, કેવી મઝા આવે… જો મુકેશ અંબાણી અચાનક સન્યાસ લઈ લે અને પોતાની તમામ મિલકત દાનમાં આપીને કહે કે આમાંથી ઇન્ડિયાના તમામ મોબાઇલ ધારકોનાં લાઇફ-ટાઈમ સુધીનાં બિલો ભરાતાં રહેશે, જાવ !
***
અને કેવી મઝા આવે… જો આપણા મોબાઈલ નંબરને આધાર કાર્ડ સાથે લિંક કરવાથી… નોકરી મળી જાય, છોકરી મળી જાય, પત્ની શાંત રહે, બોસ આપણાથી ડરે, કોરોના કદી ના થાય અને કેન્સર પણ મટી જાય ! (પછી 2023માં ભલે જે થવાનું હોય તે થાય.)
હેપ્પી ન્યુ યર !
***
- મન્નુ શેખચલ્લી
e-mail : mannu41955@gmail.com
Comments
Post a Comment