રવિવારે જે નવા કોવિડ-શબ્દ વેરિયન્ટ શોધ્યા હતા તેમાં હજી નવા ઉમેરા થઇ રહ્યા છે…
***
કો-વિષ
કોવિડના નામે રાજકીય પાર્ટીઓએ લોકોના દિમાગમાં જે ઝેર ભર્યું છે તે વાયરસનું આ સાચું નામ છે.
***
કો-વીરલા
આ મહામારીના સમયમાં અમુક મહા વીરપુરુષો પણ નામ કમાઈ ગયા ! અમુક વીરલા કોઈ ઇન્જેક્શનોનો સ્ટોક દબાવીને બેસી ગયા હતા તો અમુક વીરલા પોતે માસ્ક પહેર્યા વિના નાના બાળકને માસ્ક પહેરતાં શીખવતા હોય એવા ફોટા પડાવતા હતા !
***
કોવિરામ
ટીવીની ન્યુઝ ચેનલો માટે આ સૌથી બોરિંગ ઇન્ટરવલ હતો. જોકે હવે એ લોકો ફરી ‘બ્રેક-કે-બાદ’ બૂમ બરાડા પાડવામાં બિઝી થઈ ગયા છે.
***
કોવાવણી
સરઘસો કાઢીને, ભીડ ભેગી કરીને, મેળાઓ થવી દઈને, ધર્મસ્થાનોમાં ટોળાં ઉમેટવા દઈને જે વ્યવસ્થિત રીતે કોવિડની ‘વાવણી’ કરવામાં આવે છે તેનું જ આ નામ છે. વાવણી જેટલી સારી એટલી જ ‘લણણી’માં વધારે કમાણી !
***
કોવર
માત્ર 50-50 મહેમાનોની હાજરીમાં ડરતાં ડરતાં, માસ્ક પહેરીને જેઓ પરણ્યા છે એ ‘વર’ની વાત નથી ! આ તો બબ્બે લહેરમાં જે વર કચરા, પોતાં, વાસણ, કપડાં અને રસોઈ શીખી ગયા છે એેમનો વેરિયન્ટ છે !
***
કોવટાણા
જ્યારે કોઇ સરકારી અધિકારી કે એજન્સી સાચા આંકડાના વટાણા વેરી નાંખે છે…
***
કોવતેસર
અને જ્યારે નાની અમથી ગફલત વડે અનેક લાશોનું મોટું વતેસર થઈ જાય છે…
***
- મન્નુ શેખચલ્લી
Comments
Post a Comment