ઓમિક્રોન તો હમણાં આવ્યું પણ આપણા દેશમાં તો એની પહેલાં કંઈ કેટલાય વરસોથી ખતરનાક વાયરસનાં જીવાણુંઓ હયાત હતાં ! જુઓ લિસ્ટ…
***
લેવોક્રોન
સરકારી કર્મચારીઓ, પોલીસો, નેતાઓ, મિનિસ્ટરો કે ઇવન કોર્ટના જજ સાહેબોમાં આ વાયરસ વરસોથી ઘૂસેલો છે. આ વાયરસ જેનામાં ઘૂસ્યો તે કોઈપણ કામ કશું ‘લીધા વિના’ કરી શકતા જ નથી. એટલે જ એને ‘લેવોક્રોન’ કહે છે.
હપ્તો, કમિશન, કટકી, દલાલી, મલાઈ, લાંચ કે ભેટ જેવા શબ્દો આ વાયરસનાં જ અલગ અલગ નામો છે.
***
ઠેંગ્યુ
આ જીવાણુઓનો જેને ચેપ લાગે છે તેને ‘ઠેંગો’ દેખાડવાની આદત પડી જાય છે. એમને તમે વોટ આપો, માન આપો, સન્માન આપો, પગે પડો કે હાથ જોડીને કાલાવાલા કરો… જવાબમાં તમને ઠેંગો જ મળશે.
ચૂંટણી જીતી ગયા પછી મોટાભાગના નેતાઓને આ વાયરસ વળગે છે.
***
તીન ગુનિયા
આ જીવાણુઓના ચેપીઓને દરેક ચીજને ત્રણ ગણી કરી નાંખવાની બિમારી લાગુ પડી જાય છે. દાખલા તરીકે રોડના રિપેરિંગ માટે થનારા ખર્ચનું ટેન્ડર !
એ જ રીતે જેને દાનમાં, ભીખમાં કે સરકાર પાસેથી સબસીડીમાં કંઈ લેવું છે એ લોકો પણ પોતાની હાલત કેટલી ખરાબ છે તેની વાતો ત્રણ ગણી બઢાવી ચઢાવીને રજુ કરે છે.
***
વાંકોલાઇટિસ
આ વાયરસ મોટે ભાગે વિરોધ પક્ષના નેતાઓને લાગુ પડતો હોય છે. એમને દરેક વાતમાં કંઈને કંઈ વાંકુ જ પડતું હોય છે !
જોકે શાસક પક્ષના નેતાઓને જે જીવાણુ વળગે છે તેમાં વર્તન બદલાઈ જાય છે. અહીં પોતાની નિષ્ફળતા માટે હંમેશા બીજાઓનો વાંક કાઢવામાં આવે છે.
***
નોનસેન્સ્કીન
આ વાયરસ લગભગ દરેક નેતાના લોહીમાં જ હોય છે. એના કારણે એમની ચામડી ધીમે ધીમે જાડી થતાં થતાં સેન્સિટિવીટી ગુમાવી બેસે છે. જેના કારણે માત્ર ત્વચા જ નહીં એમની બુદ્ધિમાંથી પણ ‘સેન્સ’ ગાયબ થતી જાય છે !
***
- મન્નુ શેખચલ્લી
Comments
Post a Comment