તમે માર્ક કરજો…
અમુક લોકો રોલા પાડવા માટે મોબાઈલમાં લાખોના સોદા પાડવાની વાતો કરતા હોય છે…
…પણ એમની પાસે ફક્ત 2000 રૂપિયા ઉછીના માગો તો કહેશે કે યાર, બહુ જ તંગી ચાલે છે !
***
તમે માર્ક કરજો…
આપણી જોડે ફેસ ટુ ફેસ વાત કરવા માટે અમુક લોકો વિડીયો કોલ લગાડે છે…
… પછી પોતે ફોનમાં જોવાને બદલે ક્યાંક આઘું જ જોઈને વાતો કરતા હોય છે !
***
તમે માર્ક કરજો…
ઘરમાં વડીલ મહેમાનો આવ્યા હોય ત્યારે યુવાનો એમની જોડે વાતચીત કરવાને બદલે…
...જાણે બહુ ઇમ્પોર્ટન્ટ કામ હોય એમ પોતાના મોબાઈલમાં આંગળીઓ ફેરવવા માંડે છે !
***
તમે માર્ક કરજો…
અમુક લોકો સેલ્ફી પડાવતી વખતે તો જોરદાર સ્માઈલો આપીને પોઝ આપશે…
… પણ સેલ્ફી લેવાઈ જાય કે તરત એમનાં મોં ઉતરેલી કઢી જેવાં થઈ જાય છે !
***
તમે માર્ક કરજો…
અમુક લોકો (ખાસ કરીને યુવાનો) ટીવી ચાલુ કરીને સામે સોફામાં બેસશે…
… અને પછી મોબાઈલમાં ઇન્સ્ટાગ્રામના વિડીયો જોયા કરશે !
***
તમે માર્ક કરજો…
અમુક લોકો તમને ફની વિડીયો બતાડવા માટે છેક તમારા ખભા નીચે ઘૂસી જશે…
… અને પોતે પંદરમી વાર જોતા હોય છતાં, તમે હસી શકો એ પહેલાં જ, તમારા કરતાં પંદર ગણા જોરથી હસ્યા કરશે !
***
તમે માર્ક કરજો…
અમુક લોકોને તમે જોક્સ મોકલો, વિડીયો મોકલો, સુવાક્યો મોકલો, જાણવા જેવું મોકલો કે ઇવન હેપ્પી બર્થડે મોકલો…
… જવાબમાં તેઓ હંમેશાં એક ગુલાબનું ફૂલ જ મોકલશે ! જોજો.
***
- મન્નુ શેખચલ્લી
Comments
Post a Comment