જે રીતે ઢોંસામાં ત્રણ પ્રકાર હોય છે, સાદા ઢોંસા, મસાલા ઢોંસા અને સ્પેશીયલ મસાલા ઢોંસા… એ જ રીતે ગુજરાતીઓમાં પણ ત્રણ પ્રકાર હોય છે ! જુઓ…
***
સાદા ગુજરાતી
સીધી સાદી નોકરી કરે છે.
મસાલા ગુજરાતી
નોકરીની સાથે સાઈડમાં બીજે શેરબજારનું પણ કરે છે.
સ્પેશીયલ મસાલા ગુજરાતી
નોકરી કરતો હોય ત્યાં જ શેરબજારની દલાલી ચાલુ કરી નાંખે છે !
***
સાદા ગુજરાતી
પાડોશીની ઇન્કમ ઉપર પણ નજર રાખે છે.
મસાલા ગુજરાતી
અંબાણી અને અદાણીની ઇન્કમનો પણ હિસાબ રાખે છે.
સ્પેશીયલ મસાલા ગુજરાતી
બિલ ગેટ્સ કે આમિર ખાને છૂટાછેડા કેમ લીધા એની પાછળનો આખો નાણાંકીય હિસાબ કરીને મોઢે રાખે છે !
***
સાદા ગુજરાતી
પરણી ગયા પછી ફાંદ વધી જાય છે એટલે ક્યારેક ઉપવાસ કરી નાંખે છે.
મસાલા ગુજરાતી
ફાંદ ઘટાડવા માટે જિમ જોઈન કરે છે.
સ્પેશીયલ મસાલા ગુજરાતી
જિમના માલિક જોડે સેટિંગ પાડીને તેને નવા નવા ફાંદાળા ઘરાકો શોધી આપે છે !
***
સાદા ગુજરાતી
વેકેશનમાં ફરવા જવા માટે ગ્રુપ-ટુરમાં જાય છે, જેમાં રસોઈયો પણ જોડે આવતો હોય.
મસાલા ગુજરાતી
ફોરેનમાં ફરવા જાય ત્યારે પણ એવી ગ્રુપ-ટુર બુક કરે છે જેમાં ગુજરાતી રસોઈયો હોય.
સ્પેશીયલ મસાલા ગુજરાતી
સ્પેસ ટ્રાવેલ અથવા ચંદ્રની ટુર માટે ગુજરાતી રસોઈયાવાળી ટુર મળશે કે નહીં, તેની અત્યારથી તપાસ કરવા માંડી છે !
***
- મન્નુ શેખચલ્લી
Comments
Post a Comment