ઇન્ડિયાના ક્રિકેટરો તો સેન્ચુરી મારવાનું ભૂલી ગયા લાગે છે ! બીજી બાજુ પેટ્રોલ અને ડિઝલ ઠેર ઠેર સદી ફટકારી રહ્યાં છે.
આવા સમયે પ્રસ્તુત છે થોડી પેટ્રોલ – ડિઝલ શાયરીઓ… ગુજરાતના નામી શાયરોની માફી સાથે…
***
(માફી : કૈલાસ પંડિત)
મહેફિલની ત્યારે સાચી
શરૂઆત થઈ હશે
દારૂ ઉતર્યા પછી
પેટ્રોલની વાસથી ચડી હશે !
***
(માફી : મનહર મોદી)
બને તો એમને કહેજો
કાર ઘરમાં જ રાખે,
પેટ્રોલનાં વાહનોની
હમણાં ‘ઘાત’ ચાલે છે !
***
(માફી : શેખાદમ આબુવાલા)
નિરાશાથી અમે ગભરાઈને
આ કોનું શરણ માંગ્યું ?
ગયા પેટ્રોલ પંપ પાસે
ને પા લિટર ઝહેર માંગ્યું !
***
(માફી : કૈલાસ પંડિત)
આપણું ગ્રાહકપણું છે
એક લિટર, ચાર પોઇન્ટ, બે ટીપું
ભાવ વધઘટ થાય તો
પા લિટર, બાર પોઇન્ટ, બે ટીપું !
***
(માફી : મનહર મોદી)
ડિઝલનું તો એવું, કે સસ્તું જ છે,
હા, લોડિંગ ટ્રકને થોડો ભાર છે !
સાઈકલો લેવાનાં પ્રલોભનો થશે,
એક્સાઇઝ ને વેટ એવા ખૂંખાર છે !
***
(માફી : મનોજ ખંડેરિયા )
મને સદ્ભાગ્ય કે વિડીયો કોલ મળ્યો તારે નગર જાવા,
સ્કુટર લઈ રૂબરુ આવું તો બેન્કની લોન બે લાગે !
***
- મન્નુ શેખચલ્લી
Comments
Post a Comment