અમેરિકામાં લોકો વેક્સિન લે એ માટે ગિફ્ટ રૂપે બિયરની બાટલી, પિકચરની ટિકિટ અથવા બાસ્કેટ બોલ મેચના પાસ આપવા માંડ્યા છે !
જરા વિચારો, આપણા ઇન્ડિયામાં જો આવું થાય તો કેવી કેવી સ્કીમો આવે…. ?
***
18થી ઉપરના જુવાનોને પહેલી વેક્સિન લેવા ઉપર 150 GB ડેટા ફ્રી ! એટલું જ નહીં… 10મું પાસ થયાનું સર્ટિફીકેટ !
એ તો ઠીક, બીજી વેક્સિન લેશો તો 12મું પાસનું સર્ટિફીકેટ પણ મળી જશે (કેમ કે કદાચ બીજી વેક્સિનમાં બે વરસ પણ લાગી શકે છે)
***
45 પ્લસના પુરુષોને પહેલી વેક્સિન લેવાની સાથે ચાર રેસિપી બુક ફ્રી ! જેમાં રોટલી, દાળ, ભાત, શાક ઉપરાંત વિવિધ જાતની 150 વાનગીઓ બનાવવાની રીત હશે.
બીજી વેક્સિન લેવા ઉપર મળશે એક વેક્યુમ ક્લીનર અથવા માળિયા ઉપર ચડવા માટેની ફોલ્ડીંગ સીડી. (આમેય દિવાળી તો આવી જ જશે ને !)
***
રાજકીય કાર્યકર્તાઓને પહેલી વેક્સિનની સાથે મળશે પોતાના પ્રિય નેતાનો ફૂલ સાઇઝ ફ્રેમમાં મઢેલો ફોટો અને તેની સાથે હશે દીવી, રૂ, ઘી, કંકુ, ચોખા, ફૂલ, થાળી, ઘંટડી વગેરે સાથેથી ફૂલ પૂજા સામગ્રીની કીટ !
બીજા ઇનામ માટે કાર્યકર્તાએ પોતપોતાના મહોલ્લામાં પોતે આખા મોહલ્લાને વેક્સિન અપાવી દીધી છે એવા પુરાવા રજુ કરશે તે સૌને ખાસ ‘શાબાશી’ આપવામાં આવશે !
***
અરે, ઊભા રહો. બહેનો માટે પણ સ્કીમો છે…
18 પ્લસની બહેનોને પહેલી વેક્સિન વખતે બ્યુટિ મેકપની કીટ આપવામાં આવશે અને બીજી વેક્સિન વખતે મનગમતો રેડીમેડ ડ્રેસ મળશે.
45 પ્લસની બહેનોને પહેલી વેક્સિન વખતે કુલ 1000 પાણીપુરી ખાઈ શકાય તેવાં ભૈયાજીનાં ફ્રી વાઉચર મળશે.
અને બીજી વેક્સિન વખતે એક એવું રિમોટ મળશે જેના વડે… (આની રિસર્ચ ચાલુ છે પણ ખાતરી રાખજો, તમને જ મળશે, તમારા પતિને નહીં !)
***
- મન્નુ શેખચલ્લી
Comments
Post a Comment