એક જમાનામાં “તારી સાસુનું શાક દાઝે...” એવા શ્રાપ ચાલી જતા હતા. પણ છેલ્લા છ મહિનામાં કોરોના મહાવ્યાધિને પગલે બધું ‘ન્યુ નોર્મલ’ ઘુસી ગયું છે !
આવા ન્યુ નોર્મલ સમયમાં બદ-દુઆઓ પણ નવી જોઈશે ને ? આ રહ્યો રેડી સ્ટોક...
***
“દોરી ઉપર સુકવવા નાંખેલું તારું માસ્ક કોઈ કાગડો લઈને ઉડી જાય...”
***
“અરે, ભરબજારે તારું માસ્ક જ ફાટી જાય.”
***
“ચૂંટણી પ્રચારની રેલમાં ગયેલો કાર્યકર તારા ઘરમાં ઘુસીને છીંકો ખાય...”
***
“તારા રિપોર્ટમાં પાંચ ટકા કોરોનાનો ચેપ જોઈને તું હોસ્પિટલમાં દાખલ થાય.. અને પાંચ દિવસમાં હોસ્પિટલવાળા તારું પાંચ લાખનું કરી નાંખે...”
***
“અરે... તારી સગાઈ કોરોના વોર્ડની નર્સ જોડે થાય..”
***
“અને તારા લગનમાં પચાસ પોલીસવાળા ઘુસી આવે જેથી તને તારા જ લગન મંડપમાં એન્ટ્રી ના મળે...”
***
“તારી બૈરીના દેખતાં રોજ તારો બોસ તને ઓનલાઈન ખખડાવે...”
***
“તું માવો ખાઈને થૂંકે એટલામાં તો નાર્કોટિક્સવાળાની ઇન્કવાયરી આવી જાય...”
***
“મૂઆ, તારું કોઈ કનેક્શન રિયા ચક્રવર્તી જોડે નીકળે...”
***
“અને પછી તું જાજરૂમાં બેઠો હોય ત્યાં પણ મિડિયાવાળા ઘુસી આવે..”
***
“છેવટે કંઈ નહીં તો ફેસબુકમાં તારાથી ‘કાલ’ને બદલે ‘માલ’ લખાઈ જાય અને તું આખો દહાડો ટ્રોલ થાય !”
***
“અને બહેન, તમે પણ સાંભળી લો... કચરા-પોતાં અને રસોઈ કરતાં શીખી ગયેલો તમારો પતિ રોજ ઓફિસે જતો થઈ જાય...!”
***
- મન્નુ શેખચલ્લી
Comments
Post a Comment