આ કોરોના વાયરસને લીધે એવી એવી ઘટનાઓ બની છે કે આપણને સપનામાં ય કલ્પના નહોતી ! જુઓ….
***
સપનામાં ય નહોતું વિચાર્યું કે હું કોઈક દિવસ મોઢે બુકાની પહેરીને બેન્કમાં જઈશ અને કેશિયર પાસેથી રૂપિયા કઢાવી લાવીશ ! … તારી ભલી થાય કોરોના !
***
સપનામાં ય નહોતું વિચાર્યું કે મજુરો માટે સ્પેશીયલ ટ્રેનો ચાલતી હશે અને ધનવાનો માટેની ફ્લાઈટો પર પ્રતિબંધો હશે ! … તારી ભલી થાય કોરોના !
***
સપનામાં ય નહોતું વિચાર્યું કે ‘સજ્જનો’ જે લાળ ઉડાડે છે તેનાં ટીપાં છેક એક મીટર સુધી પહોંચતાં હશે ! ... તારી ભલી થાય કોરોના !
***
સપનામાં ય નહોતું વિચાર્યું કે લોકોના પેટમાં જેટલો આલ્કોહોલ ગયો છે એના કરતાં દસ ગણો આલ્કોહોલ હાથ ધોવામાં વપરાઈ જશે ! … તારી ભલી થાય કોરોના !
***
સપનામાં ય નહોતું વિચાર્યું કે જુવાન છોકરા-છોકરીઓ માત્ર ‘ઘરનું’ ખાવાનું ખાઈને છ-છ મહિના લગી જીવતા રહી શકે છે ! … તારી ભલી થાય કોરોના !
***
અરે, સપનામાં ય ક્યારેય નહોતું વિચાર્યું કે જે ઘરમાં છેલ્લા 50 વરસમાં કદી એક ગાળ નથી બોલાઈ એ જ ઘરના ટીવીમાં, વેબસિરિઝોમાંથી આટલી બધી ગાળો સંભળાતી હશે ! … તારી ભલી થાય કોરોના !
***
અને સપનામાં ક્યારે વિચારેલું ? …. કે બિચારું છાપું કોરોના વાયરસનો બોમ્બ હોય એમ અમુક લોકો એનાથી ડરતા હશે ! … તારી ભલી થાય કોરોના !
***
- અને હા, સપનામાં ય નહોતું વિચાર્યું કે એક ચાઇનિઝ આઈટમ આટલી ‘ટકાઉ’ નીકળશે ! … તારી ભલી થાય કોરોના !
***
- મન્નુ શેખચલ્લી
Comments
Post a Comment