(એક કટાક્ષ કાવ્ય... અન-લોક પછીની સ્થિતિ વિશે )
પડ્યા આસમાનથી
અટક્યા ખજુરમાં
એવા અમે ભૈ
અટવાયા છીએ...
છૂટ્યા લોક-ડાઉનથી
અટક્યા ‘અન-લોક’માં
એવા અમે ભૈ
ગુંચવાયા છીએ !
***
બચ્યા માંડ ‘ધમણ’થી
ખાધાં માંડ ખમણ,
હવે જાવું કેમ દમણ ?
મુંઝાયા છીએ...
***
હતા હોસ્પિટલ ભરોસે
હવે ભગવાન ભરોસે !
કહો, જીવ... કે દીવ ?
ગભરાયા છીએ !
***
હતા ઘરમાં જ સેફ ?
કે હવે બહાર અન-સેફ ?
ઝોન લાલ કે લીલામાં
સપડાયા છીએ...
***
કોઈનું કન્ટેઇનમેન્ટ
બીજાનું એન્ટરટેઇનમેન્ટ
અમે તો ‘ટીઆરપી’માં
ગણાયા છીએ !
***
પીધા કેવા કાઢા
કીધા લોહીઉકાળા
કોઈના પગમાં છાલાં
કોઈ મોતને વ્હાલા
કેટલું જાણ્યાનું ઝેર ?
કેટલી માહિતીની મ્હેર ?
રિયલ ને ‘ફેક’માં
ભરમાયા છીએ !
***
સિપાહીઓ સડકના
ડોકટરો વોર્ડના
કોણ સાચા યોધ્ધા ?
કોણ ‘હું પણ વોરિયર’ ?
અમે ‘હેશ-ટેગ’માં
હરખાયા છીએ !!
***
આંકડા રિપોર્ટમાં
ને, સેવકો રિસોર્ટમાં
બચાવો... લોકશાહીમાં
ફસાયા છીએ !
***
- મન્નુ શેખચલ્લી
Comments
Post a Comment