ઘેરબેઠાં રિસર્ચ કરો ના ?

એક ખંતીલા સજ્જને આ લોકડાઉનના કપરા સમયમાં સંશોધન કરીને શોધી કાઢ્યું :

“મમરાના એક પેકેટમાં 1236 મમરા, ત્રણ કાંકરા અને 1.25 ગ્રામ ધૂળ હોય છે.”

જોકે બીજા બધા આળસુ સજ્જનો આવાં સંશોધનોને બસ, ફોરવર્ડ કરી દે છે. જાતે મહેનત કરતા નથી !

મિત્રો, જાત મહેનત કરો અને ઘેરબેઠાં રિસર્ચ કરો ! જેમ કે અમે અમુક સંશોધનો કર્યાં છે...

***

ગુજરાતી ન્યુઝ ચેનલોમાં છેલ્લા 24 કલાક દરમ્યાન “જો કોરોના વાયરસની વાત કરીએ તો....”

એવું 189 વાર બોલાયું છે.

***

મેગીના પેકેટની સેવો (નૂડલ્સ) બફાઈ ગયા પછી તેને સળંગ એક લાઈનમાં ગોઠવીને માપવામાં આવે તો તેની કુલ લંબાઈ માત્ર 1.75 મીટર થાય છે.

***

દૂધની તપેલીને ધીમે તાપે ગેસ ઉપર ચડાવ્યા પછી મમ્મી પોતાનાં પિયરિયાં સાથે મોબાઈલમાં રોજ 22.30 મિનિટ વાતો કરે છે.

***

મારા વોટ્સ-એપમાં આજે આખા દિવસમાં 3695 મેસેજ આવ્યા. તેનો હિસાબ આ મુજબ છે.

630   ગુડ મોર્નિંગ / ગુડનાઈટ

63   જુની 'ટિક-ટોક' જોક્સ

805    જુની ટેક્સ્ટ-જોક્સ

6       નવી જોક્સ

2013    કોરોનાથી બચવાની સલાહો

178     મોદીજીનાં વખાણ

***

મેં હિસાબ કાઢ્યો છે કે જો કોરોનાતી બચવાની તમામ સલાહ માનવી હોય તો મારી પાસે...

આદુ, લસણ, હળદર, લવિંગ, આલ્કોહોલ, એરંડાનાં બી, તાંબાના વાસણ, કબૂતરની ચાંચ, જાડાં-પાતળાં કાપડના ટુકડા, સોય-દોરો, ઈલાસ્ટિક, હેલ્મેટ, બખ્તર અને...

...પ્રાણાયામ અથવા યોગાસનમાં કરેલી Ph.d.ની ચાર ડિગ્રી હોવી જોઈએ.

- આમાંથી હાલમાં મારી પાસે માત્ર આલ્કોહોલ જ છે. મારું શું થશે ?

***

મેં આલ્કોહોલનો પ્રયોગ કરી જોયો.

થોડીવાર પહેલાં મારી સામે એક ગ્લાસ હતો.

અત્યારે બે છે... (પ્રયોગ ફાયદાકારક છે.)

***

- મન્નુ શેખચલ્લી