ડિકરા મન્નુ,
તું કોઈ બકા-ડકાના લેતર તારી કોલમમાં છાપિયાં કરે ચ, તો મારા લેતર છાપતાં તને સું પેટમાં દુઃખે ચ ?
આજકાલ દસમા અને બારમાની એકઝામ ચાલિયા કરતી છે તે બાબતમાં મારે મોટા લોકને થોરી એડવાઈસ આપવી ચ.
***
આય નાલ્લાં પોયરાંને વિશ કરવાને વાસ્તે તમે બેસ્ટ-ઓફ-લકના મેસેજ-ફેસેજ કરિયા કરો તે તો સમજિયા પન આય સું, આમ લાંબા લાંબા ફોન કરવાના સારા લાગેચ?
બિચારું પોયરું જેમ-તેમ કરીને એની મોબાઈલની ગેમમાંથી મન મનાવીને વાંચવા બેથું હોય ને તમારો ફોન આવી પરે “બેસ્ટ ઓફ લક હોં… વાંચજે હોં દિકરા ?”
***
અમુક ચિપકુ ટાઈપનાં લોક તો ઘરે આવી પુગે ચ ! આવે તો આવે, ઉપરથી ઓર્ડર કરસે “બોલાવ જોઉં… બેબલીને બોલાવ ! આય અંકલને પગે લાગ ! તને આસીરવાદ આપસે તો તું પાસ થઈ જસે !”
અરે, મેડ થેઈ ગિયા ચ કે સું ? તમુને પગે લાગસે તો કંઈ તમારા પગમાંથી ક્વેશ્ચન પેપર નીકલીને એના ભેજામાં પૂગી જવાનું ચ ?
***
તમે લોકો માર્ક કરજો…
જે અંકલ આન્ટી લોક ખુદ ભણવામાં ઓર્ડિનરી હોસે તે જ ઉછલીને ઉછલીને બેસ્ટ ઓફ લક.. બેસ્ટ ઓફ લક… કરતા હોસે !
કોઈ સોજ્જો ડોક્ટર હસે, કે કંપનીનો માલિક હસે તો તે સિમ્પલી નાલ્લો સરખો મેસેજ પાઠવસે…
***
મન્નુ, તું બી માર્ક કરજે…
જે લેડીઝ લોક પોતે ગ્રેજ્યુએટ થિયા પછી બી કિચનમાં રોતલી-દાલભાત-શાકમાં ગૂંચાયા કરે ચ, તેવણને જ ‘અભિનંદન’ આપવાની બો ઝણઝણી થેઈ આવે ચ !
બાકી જે લેડીઝ જોબમાં ઊંચી પાયરી પર લાગેલી છેવ, તેમનાં મેસેજ બી તૂંકા ને ટચ હોસે.
***
અને બધા લોક માર્ક કરજો…
મારા હિસાબે આય મન્નુ શેખચલ્લી બી નિસાલમાં એક નંબરનો ડોબો હોસે… એટલે જ બધી વાતમાં બધા ઉપર કોમેન્ત કરિયા કરે ચ !
બોલો, સાચ્ચું કે નીં ?
***
- મન્નુ શેખચલ્લી
Comments
Post a Comment