મલ્ટિપ્લેક્સમાં ઓડિયન્સ વૉચિંગ !

તમે મલ્ટીપ્લેક્સમાં જઈને ફિલ્મો તો જોઈ હશે પણ ત્યાં આવતું ઓડિયન્સ જોયું છે ? નેક્સ્ટ ટાઈમ ટ્રાય કરજો, થોડા વહેલા પહોંચી જજો અને એકાદ ખૂણામાં શાંતિથી બેસીને નમૂનેદાર પ્રેક્ષકોને જરા ધ્યાનથી જોજો... તમને અદ્ભુત અને ઉલટસુલટ નમૂના જોવા મળશે.

જેમકે, આઠ-દસ વરસનો બાબો હોય તો એણે મસ્ત ફૂલ-સાઈઝનું જિન્સ પહેર્યું હશે. નીચે પ્રોપર કેન્વાસના શુઝ હશે, ઉપર નવા રંગીન ટીશર્ટ ઉપર બાબાએ જાકીટ પણ પહેર્યું હશે અને ભલું હશે તો જાકીટના ખિસ્સા પાસે એક ગોલ્ડન ચેઈન પણ લટકતી હશે. બાબાના વાળ મસ્ત સ્પાઈકવાળા સ્ટાઈલમાં હશે.

- અને એના પપ્પા ? ડલ ગ્રે કલરનું ઢીલું ટી-શર્ટ, ઢીંચણ સુધીનો બર્મુડો અને પગમાં જાડા ફ્લોટર્સ (સ્લીપર્સ) ! ટુંકમાં, બાબલાએ પહેરવાના કપડાં બાપો પહેરે છે અને બાપાનાં ફોર્મલ્સ બિચારો બાબલો પહેરે છે !

આવું તમને મમ્મીઓમાં તો ખાસ જોવા મળશે. કોઈ યંગ છોકરી હશે તો એ  તમને ડિસન્ટ પંજાબી ડ્રેસમાં જોવા મળી જશે પણ મમ્મીઓ ? ઓહોહો... શું વરાયટી હોય છે એમાં ! ટાઈટ જિન્સ અને બોડી ફિટીંગ ટૉપમાં બહેનનાં ‘અઢારે અંગ વાંકા’ દેખાઈ રહ્યાં હોય છતાં (અરે, મલ્ટિપ્લેક્સના ફોયરમાં લાઈફ-સાઈઝના અરીસાઓ હોવા છતાં) મેડમને મનમાં તો એમ જ હોય કે “હું કેવી મોડર્ન લાગું છું !”

અચ્છા, એવું નથી કે બધી મમ્મીઓ અને આન્ટીઓ મલ્ટિપ્લેક્સમાં આવું ચપોચપ પહેરીને આવતી હોય, ઘણી આન્ટીઓ પંજાબી સૂટમાં પણ હોય છે પરંતુ એમાં સાવ ઉલ્ટું ‘બિન-ગ્લેમર’ હોય છે ! બે ઘડી તો એમ જ લાગે કે બહેન આમ જ ઘરેથી સ્હેજ આંટો મારવા નીકળ્યાં હશે, બે-ચાર પાણીપુરી ખાતાં વિચાર આવ્યો હશે કે ચલને પિક્ચર જોઈ નાંખીએ ? એટલે, એવાં ને એવાં અહીં હાલ્યાં આવ્યાં છે !

મિડલ-એજના ઓડિયન્સને છોડીને યંગ પ્રેક્ષકોની વાત કરો તો સૌથી ઈન્ટ્રેસ્ટીંગ ‘ન્યુલી મેરીડ કપલ’ હોય છે. (અહીં ‘ન્યુલી’ એટલે લગ્નનાં પાંચેક વરસ ગણીને ચાલવું.) આમાં તમે માર્ક કરજો, બન્ને બહુ બની ઠનીને આવ્યાં હશે. ત્રણ ઠેકાણે ઊભાં રહીને સેલ્ફીઓ લેશે. એકબીજા જોડે વાત સાવ ઓછી કરશે છતાં જોડે ને જોડે ફરતાં હશે. પેલો ભાઈ પોતાની વાઈફને આવનારી ફિલ્મોનાં પોસ્ટરો બતાડતો હશે અને વાઈફ ? એ બીજાઓની વાઈફોનાં કપડાં, પર્સ, સેન્ડલ, મેકપ એવું બધું જોતી હશે !

આવાં કપલની એક વાત ખાસ માર્ક કરજો, ઈન્ટરવલ પછી બિચારો હસબન્ડ બહારના સ્ટોલમાંથી આખી ટ્રે ભરીને સમોસા, ફ્રેન્કીઝ, સેન્ડવીચ અને કોલ્ડ-ડ્રીંક્સ લઈને આવતો દેખાશે !

અહીં મલ્ટીપ્લેક્સમાં માત્ર પ્રેક્ષકોને નહિ, પેલા ચાલુ ફિલ્મે વચ્ચે નડ-નડ કરીને ખાણીપીણીના ઓર્ડર માગનારાઓને પણ જોવા જેવા હોય છે. એમાંથી મોટેભાગના એટલા સ્ટાઈલમાં ફરતા હોય છે કે જાણે આ જ શોમાં એને કોઈ નવી ગર્લફ્રેન્ડ પટાવી લેવાની છે ! (એ પણ ઓડિયન્સમાંથી.)

હા, બિચારા સિનિયર સિટિઝનો જરા ઓકવર્ડ લાગતા હોય છે. જોવા આવ્યા હોય ‘ગલી બોય’ પણ પોતે હોય સદરા-પાયજામામાં ! (જો સદરો પાયજામો ના હોય તો છેલ્લા સુગમ સંગીતના પ્રોગ્રામમાં પહેરેલો રંગીન ઝભ્ભો હશે !)

છેલ્લે, એવા પ્રેક્ષકોની વાત કરીએ જેને અમે ‘ઓડિયન્સ ઓફ ડાર્કનેસ’ કહીએ છીએ. આ લોકો હંમેશાં ફિલ્મ ચાલુ થઈ ગયા પછી જ અંધારામાં દબાતે પગલે આવશે, પોતાના મોબાઈલના અજવાળે ફાંફા મારતાં સીટો શોધશે, તમારા પગ કચડીને પસાર થશે, ‘તું અહીં બેસ...’ ‘તમે આ બાજુ આવતા રહો....’ વગેરે એડજસ્ટમેન્ટો કરીને માંડ સાત મિનિટે સીટમાં સેટલ થશે અને પછી તમને પૂછશે :

“...કેટલું ગયું ?”

***

- મન્નુ શેખચલ્લી

email : mannu41955@gmail.com