ચૂંટણીમાં બધું બે ટાઈપનું !

હાશ ! આખરે આજે 2019ની ઐતિહાસિક ચૂંટણીઓનું છેલ્લું મતદાન પુરું થયું.

આ વખતની ચૂંટણીઓમાં બધું બે ટાઈપનું હતું ! જુઓ…

***

બે ટાઈપનાં મતદાન

(1) શાંતિપૂર્ણ મતદાન અને (2) અશાંતિપૂર્ણ મતદાન

- આમાં થયું એવું કે જ્યાં શાંતિપૂર્ણ મતદાન થયું ત્યાં માત્ર અધિકારીઓને શાંતિ થઈ.

- અને અશાંતિપૂર્ણ મતદાન થયું ત્યાં અમુક નેતાઓને શાંતિ થઈ !

***

બે ટાઈપનાં ભાષણો

(1) વિવાદાસ્પદ ભાષણો અને (2) મનોરંજક ભાષણો

- આમાં મોટાભાગનાં ભાષણો પછી વિવાદ જ થયા.

- માત્ર એક રાહુલ ગાંધીના ભાષણોમાંથી લોકોને મનોરંજન મળતું રહ્યું !

***

દંડનીય કાર્યવાહી

(1) અડતાળીસ કલાક ચૂપ રહેવાની સજા અને (2) હંમેશ માટે ચૂપ રહેવાની સજા

- આમાં 48 કલાક ચૂપ રહેવાની સજા ચૂંટણીપંચે કરી .

- પણ હંમેશ માટે ચૂપ રહેવાની સજા ભાજપે કરી... અમુક વડીલોને ટિકિટ જ ના આપી !

***

વોટ ફોર કેશ

(1) બસ્સો-પાંચસો રૂપિયા વોટદીઠ અને (2) બોંતેર હજાર રૂપિયા કુટુંબ દીઠ

- આમાં પેલા 200-500 રૂપિયા તો આપવા પડ્યા

- પણ 72000ના તો ખાલી વાયદા જ કર્યા !

***

મતદાનની ટકાવારી

(1) સૌથી ઓછું મતદાન કાશ્મીર અને (2) સૌથી વધારે મતદાન… આંદામાન.

- આમાં તો જબરું થયું ! જ્યાં સૌથી વધુ મતદાન થયું ત્યાં માત્ર 1 બિન-મહત્વની સીટ છે

- અને જ્યાં સૌથી ઓછું મતદાન થયું એને ‘સ્પેશીયલ રાજ્ય’નો દરજ્જો મળ્યો છે ! વાહ રે લોકશાહી…

***

વિદેશી ટુરિસ્ટો

ટુરિસ્ટો એક જ ટાઈપના હતા… બિચારા !

- કારણ કે એમને ‘નીચ’ ‘ચોર’ ‘જુઠ્ઠા’ ‘બંડલબાજ’ ‘મોતના સોદાગર’ ‘ગદ્દાર’ ‘દલાલ’… જેવા દેશી શબ્દોના શું અર્થ થાય તેની ખબર જ નહોતી !

***

- મન્નુ શેખચલ્લી