લોકસભાની ચૂંટણી તારીખો જાહેર થતાં જ દેશભરમાં ખળભળાટ મચી ગયો છે.
આવા સમયે અમુક ચૂંટણીલક્ષી શબ્દોના સાચા અર્થ ખુલ્લા પડી જાય છે ! જુઓ એક નાનકડું લિસ્ટ…
***
ટિકીટ
રેલ્વેમાં ટિકીટ વડે ‘સીટ’ 'રિઝર્વ' થતી હોય છે પણ અહીં તો ‘રિઝર્વ સીટ’ માટે જ ટિકીટોની મારામારી હોય છે.
***
સીટ
એક એવી ‘બેઠક’ જેના માટે ઉમેદવારો ‘ઊભા’ રહે છે અને સીટ મળી જાય પછી ‘ઊંઘી’ જાય છે !
***
આચારસંહિતા
એ જાહેર થયા પછી, પહેલાં જે કામો જાહેરમાં થતાં હતાં તે હવે ખાનગીમાં કરવાં પડશે !
***
અમૂલ્ય મત
જેની કિંમત બિચારા મતદારોએ પાંચ-પાંચ વરસ લગી ચૂકવતા રહેવું પડે છે !
***
ઉમેદવાર
‘પગ’થી ‘માથા’ સુધીનો પ્રવાસ ખેડનાર વીરલ પ્રવાસી ! ચૂંટાયા પહેલાં તે સૌને 'પગે' લાગે છે અને ચૂંટાયા પછી સૌને 'માથે' ચડી જાય છે !
***
બહુમતી
અમુક પક્ષો માટે આ ‘વોટ-બેન્ક’ છે અને અમુક પક્ષો માટે એનો આધાર ‘લઘુમતી’ છે !
***
EVM
હારનારાઓને જેની ઉપર ‘શંકા’ હોય અને જીતનારાઓને જેની ઉપર ‘વિશ્વાસ’ હોય તેવું ઈલેક્ટ્રોનિક યંત્ર.
***
ચૂંટણીની રેલીઓ
બેરોજગારો માટે રોજગારીની તક, કામધંધા કરનારા માટે રસ્તામાં અડચણ અને મિડિયા માટે ‘કવરેજ ક્ષેત્ર’ !
***
ટીવી-ડિબેટ
32 ઈંચ બાય 42 ઈંચનો રાજકીય અખાડો.
સોશિયલ મિડિયા
સવા બે ઈંચ બાય સાડા ચાર ઈંચનો રાજકીય અખાડો.
***
દેશપ્રેમ
બેરોજગારી, મોંઘવારી, ભ્રષ્ટાચાર અને વિકાસ પછી ભારતીય ચૂંટણીઓમાં ઉમેરાયેલું લેટેસ્ટ ‘નિર્ણાયક’ બળ !
***
- મન્નુ શેખચલ્લી
Comments
Post a Comment