પેલા ગાંધી... આ ગાંધી...

ગાંધીજીના જન્મનું આ 150મું વરસ શરૂ થયું. એ તો આપણી વચ્ચે હયાત નથી પરંતુ બીજા એક ગાંધી વારંવાર અડફેટે ચડી જાય છે !

આવા સમયે વિચાર આવે છે કે “આહાહા… ક્યાં પેલા ગાંધી અને ક્યાં આ ગાંધી…”

***

પેલા ગાંધી ટ્રેનના થર્ડ ક્લાસમાં બેસીને બે વરસ માટે આખો દેશ ફર્યા.

આ ગાંધી દેશની ટ્રેનમાં ગણીને  માત્ર બે જ વાર બેઠા છે !

***

પેલા ગાંધી દેશની આઝાદી માટે રેંટિયો કાંતતા હતા.

આ ગાંધી માત્ર ફોટા પડાવવા માટે બે વાર રેંટિયો કાંતવા બેઠા છે.

***

પેલા ગાંધીએ 18 દિવસની દાંડીયાત્રા પગપાળા કરી હતી.

આ ગાંધી માનસરોવરની યાત્રા વખતે 18 કલાક પગપાળા ચાલ્યા હતા. (એવું સાબિત કરવા ફોટા પણ પડાવ્યા હતા.)

***

પેલા ગાંધી અવારનવાર અન્ન-જળનો ત્યાગ કરી દેતા હતા.

આ ગાંધી તો અવારનવાર દેશનો જ ત્યાગ કરીને ક્યાંક ગાયબ થઈ જાય છે !

***

પેલા ગાંધી તેમના ‘ઉપવાસ’ માટે જાણીતા હતા.

આ ગાંધી તેમના ‘ઉપહાસ’ માટે જાણીતા છે !

***

પેલા ગાંધીએ લોકોમાં ‘હિન્દ છોડો’નું આંદોલન શરૂ કરાવ્યું હતું.

આ ગાંધીએ લોકોમાં ‘કોંગ્રેસ છોડો’નું આંદોલન શરૂ કરાવ્યું !

***

પેલા ગાંધી માટે ગાંધીવાદીઓ કહે છે કે “આજની પેઢીએ તેમને સમજવા જોઈએ.”

આ ગાંધી માટે તો દરેક પેઢી કહે છે કે “આ ભાઈ સમજાતા જ નથી !”

***

પેલા ગાંધીના જન્મને આજે 150મું વરસ બેઠું…

અને આ ગાંધીને જોઈને ક્યારેક વિચાર આવે છે કે ભાઈને હજી 15મું ય નથી બેઠું !

- મન્નુ શેખચલ્લી