'ધી એન્ડ' પછી શું થયું?...

ફિલ્મી, વેરી ફિલ્મી...

અમુક ફિલ્મો એવી હોય છે કે એની ‘સિકવલ’ નથી આવતી. આવી ફિલ્મો ક્યારેક ટીવીમાં દેખાઈ જાય તો‘ધી એન્ડ’ આવી ગયા પછી મનમાં વિચાર આવે છે કે યાર, એ ‘પછી’ શું થયું હશે ?

તો પ્રસ્તુત છે થોડી કલ્પનાઓ...

***

પછી ગબ્બરનું શું થયું હશે ?

બે હાથ વિનાના ઠાકુરે પોતાના પગ વડે ગબ્બરના બન્ને હાથ તોડી નાંખ્યા હતા. ઠાકુર એની છાતી ઉપર ભૂસકો મારીને ગબ્બરને પતાવી જ દેવાનો હોય છે ત્યાં ‘‘ઠહરો... રુક જાવ!’’ કરતી પોલીસ આવી પહોંચે છે અને ધી એન્ડ આવી જાયછે.

એ પછી ગબ્બરનું શું થયું ? તે સાંભળો...

ગબ્બરના બન્ને હાથમાં મલ્ટીપલ ફ્રેકચરો થઈ ગયાં હતાં એટલે જેલમાં લઈ જતાં પહેલાં એને સરકારી હોસ્પિટલમં દાખલ કરીને એનું ઓપરેશન કરી, એના બન્ને હાથમાં સળિયા નાંખવા પડેલા.

એ તો બધું બરોબર, પણ એ વખતે સરકારી હોસ્પિટલમાં નકલી સળિયા સપ્લાય કરવાનું મોટું કૌભાંડ ચાલતું હતું !ગબ્બરના હાથમાં જે સળિયા નાંખેલા હતા તે સમય જતા સડવા લાગ્યા. અંદર ને અંદર કાટ ચડવા માંડ્યો !

ગબ્બર બિચારો એમ સમજતો હતો કે સાલું, મને ધોળે દહાડે પેલા ઠાકુરનાં બિહામણાં સપનાં આવે છે, એટલે જ સાલા બન્ને હાથમાં દુઃખાવો થાય છે ! પણ થાય શું ? પોતે તો જેલમાં પડ્યો છે...

આખરે એક દિવસ ગબ્બરને પેલા નકલી સળિયાના કૌભાંડની ખબર પડે છે. એને જોરદાર આઈડિયા આવે છે! એ જેલમાં બેઠો બેઠો ઠાકુરને ‘ઓફર’ મોકલાવે છે કે ચલ, હું મારા બન્ને હાથ તને આપી દેવા તૈયાર છું ! બોલ જોઈએ છે મારું ‘સ્પેરપાર્ટ’ ટાઈપનું દેહદાન ?

ઠાકુરને ઓફર ગમી જાય છે. સાલો જે ગબ્બર મને ‘‘યે હાથ મુઝે દે દે... દે...’’ કરીને જીવ ખાઈ ગયો હતો, એના જ હાથ મારા ખભામાં ફીટ થતા હોય તો આનાથી મોટો બદલો શું હોઈ શકે ? એ ‘ડન’ કરી નાંખે છે !

બસ, હવે બિચારા ઠાકુરના હાથમાં સતત કળતર થયા કરે છે ! પણ જ્યાં સુધી ‘શોલે-ટુ’ના બને ત્યાં સુધી ઠાકુર શું તોડી લેવાનો હતો !

***

સુલતાનની દીકરીઓ કિંગફીશરમાં !

‘સુલતાન’ની સિક્વલ તો હજી આવી નથી પણ એ ફિલ્મના ‘ધી એન્ડ’ પછી થયું શું ?

થયું છે એવું કે સલમાન-અનુષ્કાને ત્યાં સળંગ ચાર ચાર છોકરીઓના જન્મ થયા છે ! 

સલમાનને ‘દંગલ’ ફિલ્મ જરાય નહોતી ગમતી એટલે એ કંઈ એની દિકરીઓને કુશ્તી શીખવાડશે નહિ. અનુષ્કા પણ જાણતી હશે કે દિકરીઓ કુશ્તી કરીને શું કમાશે? (કમાણી તો એમની બાયોપિક બનાવનારા લઈ જશે.)

એટલે અનુષ્કા એની ચારેય દિકરીઓને મોડેલિંગ કરતાં શીખવાડશે. છોકરીઓ મોટી થઈ જશે પણ બહુ ફેમસ નહીં થાય.... ત્યારે અનુષ્કાને આઇડિયા આવશે કે બેબીઓ પેલા વિજય માલ્યાની ‘કિંગફીશર’ કંપનીના કેલેન્ડરમાં બિકીની પહેરીને મોડલિંગ કરે તો કેવું ?

પણ વિજય માલ્યા તો જેલમાં છે. (આર્થરરોડવાળી) કિંગફીશરને કોઈ વિદેશી કંપનીએ ખરીદી લીધી છે.

એના ચાર પાર્ટનરો છે. એમાંથી એક ગોરો, એક અફઘાની, એક ચીનો અને એક કાળો છે. હવે આ ચાર છોકરીઓ પેલા ચાર માલિકને પટાવીને કેલેન્ડરમાં સુપર મોડલ શી રીતે બનશે ? 

શું ઘરડો સલમાન એની ચાર દિકરીઓને બિકીનીમાં મોડલિંગ કરતી જોઈને બેસી રહેશે ? જુઓ‘સુલતાન-ટુ’ માં...

***

‘સંજુ’ પર કેસ થશે

ઉપરની બે તો કાલ્પનિક ફિલ્મો છે. પણ ‘સંજુ’ તો રિઅલ સ્ટોરી છે ને ?! હવે સાંભળો, એમાં ‘ધી એન્ડ’ પછી શું થયું છે...

પેલા અમેરિકામાં રહેતા સંજય દત્તના ગુજરાતી ફ્રેન્ડ કમલેશે ત્યાંની કોર્ટમાં કેસ કર્યો છે કે મારી થનારી પત્ની અને ખાસમખાસ ગર્લફ્રેન્ડ  પિન્કી જોડે સંજુએ ‘ધપાધપ’કરી નાંખેલું જેના લીધે હું માનસિક રીતે ભાંગી પડવાથી આખી જિંદગી લગ્ન કરી શક્યો નથી. એટલે હવે મને ૧૦ મિલિયન ડોલરનું વળતર જોઈએ છે !

- મન્નુ શેખચલ્લી