નવા 'બારે મેહ' !

જુના લોકસાહિત્ય મુજબ બાર જાતના મેહ (વરસાદ) હોય છે પરંતુ જમાનો બદલાઈ ગયો છે. હવે મેહના નવા પ્રકારો આવી ગયા છે...

***

(1) અમી છાંટણા મેહ

આ એક જ એવો મેહ છે જેને હંમેશાં ‘ક્રેડિટ’ મળે છે. (માત્ર 200 ટીપાં વરસે તોય !) કારણ કે રથયાત્રામાં છાંટા પડે તેને અમીછાંટણાં કહે છે.

(2) પોલ-ખોલ મેહ

પત્રકાર જગતના હિસાબે સિઝનનો પહેલો વરસાદ ‘સરકારી તંત્રની પોલ ખુલી ગઈ’ એવું સાબિત કરવા માટે જ પધારે છે.

(3) ટ્રાફિક-જામ મેહ

રોડની બન્ને સાઈડે 1 થી 1.5 ઇંચ જેટલાં ઊંડા પાણી ઘેરાવાને કારણે તેમાં 'ડૂબી મરવાના' ભયથી હજારો વાહનો તેનાથી દૂર રહે છે. સરવાળે સર્જાતા ટ્રાફિક-જામના મૂળમાં માત્ર દોઢ ઈંચનો મેહ હોય છે !

(4) પાણી ઘૂસ્યાં મેહ

એક તો નીચાણવાળા વિસ્તારમાં સોસાયટી બાંધી હોય પછી એમાં પાણી ઘૂસી જાય… તો ઘૂસ કોણે મારી કહેવાય ? માણસે કે વરસાદે ?

(5) આગાહી મેહ

હવામાન ખાતાની આગાહી મુજબ ખરેખર વસતો ‘આજ્ઞાંકિત’ મેહ !

(6) રેકોર્ડ મેકર મેહ

નવસારી, વલસાડ, ઉમરગામ, મુંબઈ જેવા શહેરો દરિયાકાંઠે હોવાથી ત્યાં 24 કલાકમાં 10-12 ઇંચ વરસાદ પડે જ છે. પરંતુ બીજાઓ માટે તે ‘રેકોર્ડ’ છે !

(7) વોટ્સએપ મેહ

આમાં મુંબઈનો વરસાદ દર વખતે મેદાન મારી જાય છે. બિચારા ગુજરાતવાસીઓને ભાગે તો ફોરવર્ડેડ ફોટા અને જોક્સ જ આવે છે.

(8) કાવ્ય-સર્જક મેહ

ક્યાંક પડેલો જરી અમથો વરસાદ સોશિયલ મિડિયાના સુષુપ્ત કવિઓને ‘દાદૂર-સેના’ની માફક જથ્થાબંધ કાવ્ય સર્જનો કરવા માટે ‘ઉદ્દીપક’નું કામ કરે છે. ( છતાં કોઈ કવિતામાં ‘હે ઉદ્દીપક !’ એવું લખેલું આવતું નથી.)

(9) હવાઈ નીરીક્ષણ મેહ

નેતાજી વિમાનની બારીમાંથી નીચેનું બ્રાઉન-બ્રાઉન પાણી જોતા હોય તેવી તક આપતો વરસાદ.

(10) રાહત સામગ્રી મેહ

ચૂંટણીઓ નજીક હોય ત્યારે કાર્યકરો આ પ્રકારના મેહની રાહ જોતા હોય છે કારણ કે…
આફત એ જ ‘અવસર’ !

(11) સેલ્ફી મેહ

આના માટે બે સ્થિતિ જરૂરી છે. (૧) વરસાદ આછો હોવો જોઈએ. (૨) મોબાઈલ વોટરપ્રુફ હોવો જોઈએ.

(12) કેરળ મેહ

હકીકતમાં આ મેહ પ્રથમ નંબરે આવે છે, જ્યારે આપણને ન્યુઝ મળે છે કે…. “કેરળમાં ચોમાસું બેસી ગયું !”

- મન્નુ શેખચલ્લી