આપણા મહાત્માઓ અને ધર્માત્માઓ એવી ગોળગોળ વાતોના ગુબ્બારા ઉડાડતા રહે છે કે એમાં ટાંકણી માર્યા વિના રહી શકાતું નથી…
***
જ્ઞાન : ‘એક દિવસ તો મરવાનું જ છે, પછી આ બધી ઉપાધિ શા માટે કરવી ?’
ટાંકણી : જો દરેક ક્રિકેટર એમ વિચારે કે એક વાર તો આઉટ થવું જ પડશે… પછી રન લેવા માટે શું દોડાદોડી કરવી ? આમાં ને આમાં તો સમૂળગું ક્રિકેટ જ પતી જાય ને ?
(ક્રિકેટ = દુનિયાનો વ્યવહાર)
***
જ્ઞાન : ‘સાથે કંઈ આવવાનું નથી. બધું અહીં જ છોડીને જવું પડશે.’
ટાંકણી : મુકેશ અંબાણી તો એમના સંતાનો માટે ઘણું બધું ‘છોડીને’ જશે… પણ બાપલ્યા, દેશની ૯૯ ટકા પ્રજા ‘સાચવશે’ તો જ એમનાં છોકરાંને કામમાં આવશે.
***
જ્ઞાન : ‘આ સંસાર તો માયા છે, ભ્રમ છે, અહીં કશું જ સાચું નથી.’
ટાંકણી : તો દાનપેટીમાં નકલી નોટો નાંખીએ તો ચાલશે ?
***
જ્ઞાન : ‘મોત ક્યારે આવશે તે કોઈ જાણતું નથી.’
ટાંકણી : તો પછી ‘આયુષ્યમાન ભવ’ના આશીર્વાદ કયા હિસાબે આપો છો ? હેં ?
***
જ્ઞાન : ‘મનની શાંતિ આપણે આપણી અંદર જ શોધવાની છે.’
ટાંકણી : અચ્છાઆઆ… એટલે જ આપણે ધાર્મિક તહેવારો વખતે કાન ફાડી નાંખે એવો ઘોંઘાટ કરીએ છીએ ! કેમકે ‘સાયલેન્સર’ તો આપણી અંદર જ ફીટ કરેલું છે ને ?
***
જ્ઞાન : ‘ચોર્યાસી લાખ જન્મ પછી આ માનવીનો અવતાર મળે છે. એ પણ આગલા જન્મોમાં પૂર્ણય કર્યા હોય તો જ.’
ટાંકણી : એ હિસાબે ભારતમાં જે ૧૪૨ કરોડ માનવીઓ જન્મ્યા છે એ કોનાં પૂણ્યો છે ? અમેરિકનોનાં ? કે યુરોપિયનોનાં?
***
જ્ઞાન : ‘બધું અહીંનું અહીં જ ચૂકતે થાય છે.’
ટાંકણી : તો પછી સ્વર્ગ અને નર્કની આખી વાત જ બોગસ ? એ જ રીતે ‘ગયો જનમ’ અને ‘આવતો જનમ’ એવી વાતો પણ ધૂપ્પલ જ છે ને ? બોલો.
***
- મન્નુ શેખચલ્લી
Comments
Post a Comment